Arnaıy ekonomıkalyq aımaq aıasynda elordada qandaı jobalar júzege asyrylyp jatyr

NUR-SULTAN. QazAqparat – Nur-Sultan qalasynda arnaıy ekonomıkalyq aımaq jobasy aıasynda jumys isteıtin ónerkásip nysandarynyń jumysy tanystyryldy, dep habarlaıdy QazAqparat.

Elordadaǵy «Astana – jańa qala» ekonomıkalyq aımaǵynda osy ýaqytqa deıin 5 myńǵa jýyq jumys orny ashylyp, 50 joba iske qosyldy jáne 31 joba qolǵa alynyp jatyr.

«Nur-Sultan qalasyna ınvestıtsııa tartý baǵytynda aýqymdy jumys istelinip jatyr. 2019 jyly 1,1 trln teńge kóleminde ınvestıtsııa tartylsa, 2020 jyly bul soma 2 trln teńgege jetti. Investıtsııa kóbine ónerkásip salasyna quıylyp jatyr. Sonyń arqasynda jańa jumys oryndary ashylyp, halyqty eńbekpen qamtý josparǵa saı júrip jatyr. Qazirgi ýaqytta elordadaǵy arnaıy ekonomıkalyq aımaqta 52 mekeme jumys istep tur. Odan bólek, bıyl taǵy 10 ónerkásip orny iske qosylmaq. Atap aıtqanda, kosmetıka jáne ıissý shyǵaratyn ónerkásip, lıft, qurylys zattary zaýyty jáne taǵy basqa», - dedi elordadaǵy Arnaıy ekonomıkalyq aımaq basshysynyń orynbasary Baqytjan Dosqazıev.

Sondaı-aq, atalǵan ókil otandyq ónimderdiń alys-jaqyn shet memleketterge eksporttalyp jatqanyn aıtty.

«2019 jyly astanalyq AEA-nan 11 mlrd teńgeniń taýary esporttaldy, al ótken jyly bul kórsetkish 28 mlrd-qa deıin ósti. Búginde otandyq ónimder Qyrǵyzstan, Ózbekstan, Ázerbaıjan, Reseı, Moldova, Túrkııa jáne Taıland elderine eksporttalyp jatyr. Olardyń qatarynda elektrovoz, lokomotıv, aýyl sharýashylyǵynda qoldanatyn tyńaıtqysh ónimderi, maldyń qulaǵyna arnalǵan syrǵa jáne taǵy basqalar bar. Odan bólek, jaqynda ǵana Túrikmenstan men Tatarstanǵa jumys saparymen baryp elordada óndiriletin ónimderi tanystyryp, sonda satý jóninde kelisimge keldik», - deıdi ol.

Búginde elordada AEA aıasynda iske qosylǵan ónerkásiptiń biri «Spetsproektprogress» JShS. Onda metall qurylymdary men sendvıch panel óndiriledi jáne onyń jobalyq qýaty 4 myń tonnaǵa deıin ónim shyǵara alady. Atalǵan jerde 200-den astam adam jumys istep jatyr.

Sonymen qatar «Astana ıÝtarııa ltd» JShS. Jeńil ónerkásip baǵytyndaǵy atalǵan nysan kıim-keshek, toqyma ónimderi, tósekjaı jıyntyqtary men tigin óndirisine qajetti zattardy shyǵarady. Quny 2,5 mlrd teńgeni quraıtyn joba boıynsha búginde 400-den astam adam eńbek etýde.

Aıta ketsek, búginde elimizde 13 arnaıy ekonomıkalyq aımaq jumys isteıdi. Osy ýaqytqa deıin 303 joba iske qosylyp, ol 20 myńnan astam jumyspen qamtydy.

AEA-ta shyǵarylǵan ónimder arasynda tikushaqtar, vıntovkaǵa arnalǵan optıkalyq kózdeýishter, túngi kórý qurylǵylary, bronetransporterler, lokomotıvter, elektrli lokomotıvter, jolaýshylar vagondary, premıým-qubyrlar, maqta tsellıýlozasy, polıpropılen jipteri jáne taǵy basqa.