Arnaýly zań jobasyn ázirleý aıasynda jeltoqsandyqtardyń máselesi talqylanady

NUR-SULTAN. QazAqparat – Arnaýly zań jobasy aıasynda jeltoqsandyqtardyń máseleleri talqylanady. Bul jaıynda Májilis depýtattarynyń saýalyna QR Premer-Mınıstriniń orynbasary Eraly Toǵjanovtyń jaýabynda aıtylǵan, dep habarlaıdy QazAqparat tilshisi.

«Saıası qýǵyn-súrgin qurbandaryn tolyq aqtaý jónindegi memlekettik komıssııanyń jumys jospary aıasynda arnaýly zań jobasyn ázirleý kózdelgeni belgili. Osy zań jobasyn ázirleý barysynda Jeltoqsan oqıǵasyna qatysýshylar máseleleri de talqylanatyn bolady», - delingen Eraly Toǵjanovtyń jaýabynda.

Onyń atap ótýinshe, saıası qýǵyn-súrgin qurbandary retinde tanylǵan azamattardy áleýmettik qoldaý sharalary «Jappaı saıası qýǵyn-súrginder qurbandaryn aqtaý týraly» QR Zańynda aıqyndalǵan. Osy Zańda aqtalǵan azamattardyń qamaýda bolǵan ár aıy úshin birjolǵy aqshalaı ótemaqy tóleý belgilengen. Jergilikti ákimdikter bıýdjet múmkindikterine qaraı Jeltoqsan qatysýshylaryna Táýelsizdik kúnine oraı jyl saıyn birjolǵy materıaldyq kómek kórsetedi.

«Bul úrdis bıyl da óz jalǵasyn tabady. Sonymen qatar, jeltoqsan oqıǵasyna qatysýshylardy áleýmettik qoldaý, qoǵamdyq-saıası is-sharalarǵa keńinen tartý, Táýelsizdiktiń 30 jyldyǵyna oraı merekelik medaldarmen marapattaý jumystary uıymdastyrylýda. Jalpy Jeltoqsan qaharmandarynyń azamattyq erligin josparly túrde nasıhattaý, olardy áleýmettik qoldaý máseleleri boıynsha jumystar júrgizilýde jáne Úkimettiń turaqty baqylaýynda», - delingen jaýapta.