Arnaýly áskerı jıynǵa áıelder shaqyryla ma - Bas shtab jaýaby

NUR-SULTAN. QazAqparat - QR Qarýly Kúshteri Bas shtaby basshysynyń orynbasary Serik Boranbaev arnaýly áskerı jıynǵa áıelder qatysa ala ma degen suraqqa jaýap berdi, dep habarlaıdy QazAqparat.

«Bul jaǵdaıda alda turǵan mindetterge baılanysty ákimdikter ózderi sheshim qabyldaıdy. Meniń oıymsha, munda esh shekteý joq. Ákimdikterge aıryqsha quziret pen sheshim qabyldaý quqyǵy berilgen. Eger sáıkes mamandyqtar boıynsha qyzdar qajet bolsa, shaqyrý jibere alady», - dedi spıker Ortalyq kommýnıkatsııalar qyzmetindegi brıfıngte.

Onyń aıtýynsha, respýblıka boıynsha 473 áskerı mindetti arnaýly jıynǵa shaqyrylǵan.

Aıta keteıik, 2 sáýir kúni Memleket basshysy Qasym-Jomart Toqaev áskerı mindettilerdi arnaýly jıynǵa shaqyrý týraly Jarlyq shyǵarǵan edi.

Qazirgi ýaqytta Nur-Sultan, Almaty qalalarynda, Almaty, Qyzylorda, Pavlodar, Aqmola oblystarynda arnaýly jıyn bólimsheleri quryldy.

Aqtóbe, Atyraý oblystarynda áskerı mindettilerdi shaqyrý jalǵasýda. 13 sáýir kúni Shymkent qalasy men Qaraǵandy oblysynda, 14 sáýirde - SQO, 15 sáýirde - Jambyl, 17 sáýirde - Túrkistan oblysynda shaqyrý bastalady.

Al BQO, ShQO, Qostanaı jáne Mańǵystaý oblystarynda arnaýly jıyn ótkizý máselesi qarastyrylmaǵan.