Arnaýly áleýmettik kómekti esepteý máselesi ózekti - depýtat

QYZYLORDA. QazAqparat - Májilis depýtattary Abzal Eralıev, Natalıa Jumadildaeva, Balaım Kesebaeva men Nurjan Áltaev Qyzylorda oblysy Talsýat aýyldyq okrýginde ornalasqan arnaýly áleýmettik qyzmet kórsetý balalar ortalyǵynyń jumysymen tanysty. Bul týraly QazAqparat Májilistiń baspasóz qyzmetine silteme jasap habarlaıdy.

Kezdesý barysynda depýtattar Tuńǵysh Prezıdent - Elbasy Nursultan Nazarbaevtyń múmkindigi shekteýli azamattarǵa sonyń ishinde balalarǵa, az qamtylǵan jáne kóp balaly otbasylardy qoldaýǵa baǵyttalǵan áleýmettik bastamalaryn júzege asyrý jónindegi máselelerdi jan-jaqty sóz etti.

Halyq qalaýlylary «Nur Otan» partııasynyń 2030 jylǵa» deıingi Baǵdarlamasynda múgedekterdiń quqyqtaryn qamtamasyz etýge erekshe nazar aýdarylǵan jáne onyń maqsaty - múgedekterdi tolyq qoldaýdy qamtamasyz etý, arnaıy áleýmettik qyzmetter kórsetýdiń progressıvti prıntsıpine kóshý ekeni týraly málimdedi.

Sondaı-aq, partııa baǵdarlamasynda, osy másele boıynsha halyqaralyq standarttarǵa saı keletin, múgedek balalardy tárbıeleıtin otbasylarǵa qarjylaı kómek kórsetý deńgeıin arttyrý qarastyrylǵan. Atap aıtqanda, balalardyń ata-analary men qamqorshylaryna arnalǵan járdemaqy aǵymdaǵy jyldan bastap 30%-ǵa artty, múgedekterdi áleýmettik qoldaý ınfraqurylymy jańǵyrtylady. Múgedekterge arnalǵan pansıonattar qalalarda da, aýyldyq eldi mekenderde de áleýmettik qyzmet kórsetý ortalyqtaryna aýystyrylýy tıis.

Depýtattarǵa ortalyqty tanystyrǵan mekeme basshysy Aıgúl Shamshatova:

«Múmkindigi shekteýli múgedek balalarǵa medıtsınalyq, áleýmettik jaǵdaı jasaýda ǵımarattyń qyzmet kórsetýge arnalǵan árbir bólmesi zamanaýı qural-jabdyqtarmen jabdyqtalǵan. Qazir statsıonarda - 64, al jartylaı statsıonarda - 46 múmkindigi shekteýli balalar tárbıelenip, em alýda», - dedi.

2016-2018 jyldarda ortalyqta em alǵan 30 azamat otbasyna saýyǵyp oralǵan. Jalpy jaǵdaıy ońalǵandar sany sany 34, dene qımyl qozǵalysy jaqsarǵandardyń sany 69, sondaı-aq, 15 bala qosalqy tirek apparatyn tastap, aıaqqa turdy.

«Bizder birneshe kúnnen beri oblystaǵy birqatar aýmaqtarda bolyp, shalǵaı eldi mekenderdiń jaǵdaıymen tanystyq. Ol jerlerde de túrli áleýmettik nysandar paıdalanýǵa berilgendigin kózimizben kórdik. Osy balalar ortalyǵy múmkindigi shekteýli balǵyndarymyz úshin óte qajet. Munda barlyq jaǵdaılar jasalǵan. Oblys boıynsha jergilikti turǵyndarmen kezdesý barysynda arnaýly áleýmettik kómektiń eseptelýindegi máseleler ózekti bop turǵanyn baıqadyq. Aldaǵy jumysta osy máseleni esepke alatyn bolamyz»,- dedi májilis depýtaty Nurjan Áltaev.