Armııalyq halyqaralyq oıyndarda Qazaqstannyń áskerı teńizshileri alda keledi

NUR-SULTAN. QazAqparat - Armııalyq halyqaralyq oıyndardyń «Teńiz kýbogy» konkýrsynda Qazaqstannyń áskerı teńizshileri korabldi saqtap qalý úshin áreket etýde birinshi orynǵa ıe boldy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Iran korabliniń ekıpajy da bizdiń jaýyngerlermen teń tústi. «Suńqar ańshylyǵy» konkýrsynyń birinshi kezeńi úsh jattyǵýynyń qorytyndysy boıynsha Qazaqstan komandasy úzdik nátıje kórsetti. Upaı sany jaǵynan Reseı de bizdiń komandamen birge birinshi orynda tur.

Armenııada ótip jatqan «Beıbitshilik jaýyngeri» konkýrsyna qatysýshylar «Kásipqoı» kezeńiniń eki jattyǵýyn oryndady. Qazaqstan komandasynyń ókili aǵa serjant Darhan Aslan barlyǵyn artta qaldyryp, kedergiler jolaǵynan 6 mınýt 17 sekýndta ótti.

Úsh jarystyń qorytyndysy boıynsha Reseı kósh bastap tur, ekinshi orynda Qazaqstan áskerı qyzmetshileri keledi.

«Elbrýs sheńberi» konkýrsynda birinshi kezeńniń qorytyndysy boıynsha Reseı komandasy birinshi orynda, Qazaqstan ekinshi orynda, al úshinshi oryn Ózbekstanǵa buıyrdy. Birinshi kezeń barysynda qatysýshylar jasandy taý bederine órmeleýden bastap taýdaǵy kedergiler jolaǵynan ótý jáne oq atýdy oryndaý sııaqty bes túrli arnaıy tapsyrmany oryndady.

Sonymen qatar, Armııalyq halyqaralyq oıyndardyń basqa konkýrstary boıynsha da jarystar jalǵasýda. Saıys sharyqtaý shegine jetip, ár komandanyń jeńiske degen umtylysy artyp keledi.