Armııadaǵy álimjettik máselesi: Qandaı sharalar qabyldanýda

NUR-SULTAN. QazAqparat – QR Qarýly Kúshteri sapynda álimjettikti joıý jónindegi jumystardyń arqasynda osyndaı jaǵdaılardyń sany bir jylda 47%-ǵa tómendegen, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

QR Qarýly Kúshteri Bas shtaby Tárbıe jáne ıdeologııalyq jumystar departamenti bastyǵynyń orynbasary polkovnık Ermııan Bıatovtyń aıtýynsha, búginde tańda ár laýazymdy tulǵanyń mansaby bólimshedegi tárbıe jumysyn durys uıymdastyrýǵa baılanysty bolady. ıAǵnı, laýazymdy kóterý, áskerı ataq alyp, akademııaǵa túsý úshin bastyqtar osy máselege erekshe nazar aýdarýy kerek.

«Barlyq dárejedegi komandırler, sondaı-aq serjanttar buǵan jeke basymen jaýap beredi. Olar áskerı qyzmetshiler arasyndaǵy tártipti qoldaýǵa barlyq kúsh-jigerin salady», - dedi Ermııan Bıatov.

Eń aldymen barlyq áskerı qyzmetshiniń jaýyngerlik daıarlyǵy, sportty, bos ýaqyt pen tárbıe is-sharalaryn qamtıtyn naqty kún tártibi turaqty túrde baqylanady. Jeke quramdy baqylaý úshin «Jaýyngerlik dos» júıesi engizilgen. Ol boıynsha ádette laýazymy men áskerı ataǵy boıynsha teń eki áskerı qyzmetshi bir-birine bekitiledi. Bul minez-qulyqtaǵy normadan aýytqý belgilerin ýaqtyly anyqtaýǵa jáne áskerı ujymda jaǵymsyz qylyqtardy aldyn alýǵa múmkindik beredi.

Sondaı-aq, áskerı bólimderde Qorǵanys mınıstrligi ázirlegen oqý modýlderi boıynsha oqytý men tárbıeleý jumystary júrgizilýde. Olarǵa ahýaldyq keıster qosa beriledi. Onda qaqtyǵystardy ońtaıly sheshý joldary, jarǵydan tys qarym-qatynastyń saldarynan oryn alatyn ahýaldar usynylǵan.

Osy baǵytta belsendi túsindirme jumystardy áskerı polıtsııa da júrgizedi. Eger tulǵa aralyq nemese qyzmettik máselelerdi sheshýde bireý kúsh qoldansa, quqyq qorǵaý organdary dereý áreket etedi.

«Qabyldanǵan uıymdastyrýshylyq sharalardy eskere otyryp, quqyqqa qarsy áreket jasaý jáne ony baıqamaı qalý shyn máninde múmkin emes. Bólimderdegi beınebaqylaý júıesi barlyq nysan men úı-jaılardy qamtıdy. Kez kelgen jaraqat, anyqtalǵan jaǵdaıda qyzmettik tekserý júrgiziledi, materıaldar qaraý úshin áskerı polıtsııaǵa jiberiledi», - deıdi ol.

Tıimdi oılaıtyn jastar áskerı bılet alýdyń ornyna sottalýshynyń oryndyǵyna otyrǵyzylyp, ómir boıy sottalǵandyǵyn aıshyqtaıtyn tańba taǵylatynyn anyq túsinedi. Jeke qurammen jumys isteıtin ofıtserler de, serjanttar da, qyzmetkerler de álimjettikke jol berse áleýmettik kepildikteri bar turaqty jumystan aıyrylýy múmkin.