Armııa sportshylary sambodan halyqaralyq týrnırdiń jeńimpazy atandy

AQTAÝ. QazAqparat - Aqtaýdaǵy «Mańǵystaý-arenada» sporttyq jáne jaýyngerlik sambodan Azııa kýbogyna halyqaralyq jarys ótti. Onda 9 elden 200-ge jýyq sportshy kúsh synasty, dep habarlaıdy QazAqparat.

Týrnırge Qorǵanys mınıstrligi Ortalyq sport klýbynyń ókilderi de belsendi túrde qatysty. Búginde Qarýly kúshterde osy áskerı-qoldanbaly sport túrin keńinen nasıhattaýǵa basa nazar aýdarylyp otyr.

Jarysta áskerı sportshylar 4 medal jeńip aldy. Óz salmaq dárejesinde óner kórsetken efreıtor Arnur Qýataı, sondaı-aq Qorǵanys mınıstrligi Ortalyq sport klýby sport rotasynyń jaýyngerleri Áset Anarbaev pen Esentaı Imahanov jeńimpaz atansa, Jasulan Narımanov ekinshi oryndy ıelendi.

Qorǵanys mınıstrligi Ortalyq sport klýby ókilderiniń jetistikteri Qazaqstan quramasynyń týrnır qorytyndysy boıynsha jalpykomandalyq esepte jeńiske jetýine eleýli úles boldy.

Foto: t.me/modgovkz