Armııa oıyndaryna qatysý úshin áskerı-medıtsınalyq estafeta aıaqtaldy (FOTO)
Bul týraly QR Qorǵanys mınıstrliginiń baspasóz qyzmetinen habarlady. Baıqaý sheńberinde áskerı medıkter áskerlerdiń jaýyngerlik daıarlyǵyn medıtsınalyq qamtamasyz etýde qoldanatyn ózderiniń daǵdylary men sheberlikterin kórsetti.
Baıqaý eki kezeńde ótti. Atap aıtqanda, «Jeke sheberlik» pen «Komandalyq birinshilik». Birinshi kezeńde áskerı qyzmetshiler áskerı-sporttyq kedergilerden ótti, shtattyq qarýdan oq atty, medıtsınalyq qyzmettiń jeke quramyna arnalǵan arnaıy daıarlyq boıynsha normatıvterdi oryndady. Ekinshi kezeń oqý-taktıkalyq alańnyń jabdyqtalǵan qashyqtyǵynda jáne tankodromnyń daıyndalǵan baǵdarynda ótkizildi. Onda mehanık-júrgizýshiler jerdiń kúrdeli jaǵdaılarynda ózderiniń júrgizý sheberlikterin pash etti. Áskerı aq jeleńdiler urys alańynan shartty jaralanǵandardy alyp shyǵý, zaqymdalǵan urys tehnıkasynan jaralylardy shyǵarý jóninde kásibı turǵydaǵy mashyqtaryn kórsetti jáne alǵashqy medıka-sanıtarlyq kómek kórsetti.
Ekinshi kezeńde urys jaǵdaılarynda júrgizý boıynsha kásibı qabilettiligi bolýy tıis mehanık-júrgizýshiniń sheberligi negizgi rólge ıe. Medıtsınalyq qyzmetterdiń áskerı qyzmetshileri mundaı saıystan alǵash ret ótip jatqandaryn aıta keteıik. Qorytyndysy boıynsha jalpy komandalyq birinshilikte Aeroutqyr áskerleriniń komandasy birinshi oryndy, «Ońtústik» óńirlik qolbasshylyǵy ekinshi oryndy ıelendi. «Jeke birinshilik» atalymynda erler arasynda 11971 áskerı bóliminiń sanıtarlyq nusqaýshysy aǵa serjant Erjan Elýbaev, áıelder arasynda 61993 áskerı bólimi medıtsınalyq rotasynyń meıirbıkesi aǵa serjant Elnara Bútimbaeva úzdik atandy. 12 úzdik áskerı medık endi 2016 jylǵy Armııa halyqaralyq oıyndaryna qatysýǵa daıyndalady. Jattyqtyrý qorytyndysy boıynsha 6 áskerı medık Reseı Federatsııasynda ótetin Armııa oıyndary-2016 halyqaralyq kezeńine qatysýdy jalǵastyrady. Mundaı jarystardyń maqsaty halyqaralyq áskerı yntymaqtastyqty nyǵaıtý, áskerı qyzmet pen medıtsınalyq mamandardyń áskerı-kásibı qyzmetiniń bedelin arttyrý bolyp tabylatynyn esterińizge sala keteıik.