Armenııadan ákelingen júzden astam avtokólik Almaty oblysynda ýaqytsha tirkeýge qoıyldy

TALDYQORǴAN. QazAqparat - Memleket basshysynyń tapsyrmasyna sáıkes qabyldanǵan Qazaqstan Respýblıkasy Úkimetiniń qaýlysy elimizdiń aýmaǵyna Armenııa Respýblıkasynan ákelingen avtokólikterdi tirkeýge alý tártibin anyqtady. Atalǵan qaýlyǵa sáıkes sheteldik tirkeýdegi, naqty aıtqanda Armenııa elinde tirkeýde turǵan kólikterdiń ıeleri arasynda túsindirý jumystary júrgizilip, elimizde qaıta tirkeýge qoıý qajettiligi aıtyldy, dep habarlaıdy QazAqparat tilshisi Almaty oblystyq Polıtsııa departamenti baspasóz qyzmetine silteme jasap.

«Armenııalyq kólikterdi elimizde mindetti tirkeý qajet ekeni túsindirildi. Osy ýaqytqa deıin Almaty oblysynda 102 kólik tirkeýden ótti. Sheteldik tirkeýdegi kólik ıeleri temir tulparlaryn Qazaqstanda tirkeýden ótkizýdiń artyqshylyqtaryn jete túsinýi tıis. Óıtkeni, tirkeýden ótken kólikti elimizde esh kedergisiz paıdalanýǵa bolady»,- dedi Almaty oblysy PD Ákimshilik polıtsııa basqarmasy bastyǵynyń orynbasary polıtsııa polkovnıgi Nurjan Tańatarov.

Vedomstvo ókiliniń aıtýynsha, kólikti ýaqytsha tirkeýden ótkizýge shamamen 12 myń teńge tólem jasalady. Armenııa elinen ákelingen kólikterdi tirkeý bıylǵy jyldyń qyrkúıek aıyna deıin jalǵasady.

«Armenııalyq kólik ıesi atanǵan Almaty oblysynyń barlyq turǵyndaryn osy múmkindikti paıdalanyp, elimizde tirkeýden ótkizýge shaqyramyn. Kólikti tirkeýge qatysty kez kelgen suraqtaryńyz bolsa, Mamandandyrylǵan halyqqa qyzmet kórsetý ortalyǵynyń qyzmetine júginýlerińizge bolady»,- dedi polıtsııa polkovnıgi Nurjan Tańatarov.