Armenııada vaktsına egiletinderdiń jas sanaty anyqtaldy

EREVAN. QazAqparat – Armenııanyń Densaýlyq saqtaý mınıstrliginiń sheshimi boıynsha Astra Zeneca preparatymen 55 jastan asqandar egiledi. 18-54 jas aralyǵyndaǵy azamattar «Spýtnık V» ekpesin almaq. Bul týraly Armenııanyń Densaýlyq saqtaý mınıstri Anaıt Avanesıan aıtty, dep habarlaıdy QazAqparattyń menshikti tilshisi.

Armenııanyń Densaýlyq saqtaý mınıstrligi jaqyn arada halyqty vaktsınalaýdy bastaıdy. Protsess aldynda mınıstrlik egýge preparat tańdaýda arnaıy jas sanattaryn belgilep aldy. Vedomstvo sheshimi boıynsha, Astra Zeneca vaktsınasy 55 jastan joǵary qaýip-qater tobyndaǵy adamdarǵa egilmek.

Astra Zeneca vaktsınasyn paıdalanýda qaýipsizdikti qamtamasyz etý úshin jas shekteýi qoıylǵan. Barlyq kásibı qurylymdar keńesterin zerdeleı otyryp, Astra Zeneca vaktsınasyna jas shekteýin qoıý týraly sheshim qabyldandy. Bul preparatpen 55 jastan asqandar ǵana egilmek», - dep málimdedi A. Avanesıan.

A. Avanesıannyń aıtýy boıynsha, «Spýtnık V» vaktsınasy partııasynyń shekteýli ekenine oraı, ony paıdalanýda da arnaıy azamattar toby belgilengen: 18-54 jas aralyǵyndaǵy medıtsınalyq qyzmetkerler, 54 jasqa deıingi sozylmaly aýrýy bar adamdar, 55 jasqa deıingi áleýmettik qaraý ortalyqtarynyń turǵyndary men qyzmetkerleri.

«Medıtsınalyq qyzmetkerlerdiń naqty, túsinikti krıterıı bolýy shart. Kimdi vaktsınalaý jóninde túsinispeýshilik bolmaýy kerek. Biz bundaı saıasatty barynsha kóp adamdy vaktsınalaý maqsatynda qabyldadyq. «Spýtnık V» vaktsınasynyń jańa partııasy kelgen kezde atalmysh krıterııler qaıta qaralýy múmkin», - dep túsindirdi sheshimdi mınıstr.

Armenııanyń Densaýlyq saqtaý mınıstrliginiń málimentinshe, qazirgi kezde vaktsına alýǵa 600-den asa adam kezekke turǵan. Vedomstvo 700 myńǵa jýyq adamdy vaktsınalaýdy kózdep otyr. Ol Erevanda 13 sáýirden bastalmaq, 14 sáýirden bastap óńirler qosylady. Qazirgi kezde bar preparattardy vaktsınalaý ortalyqtaryna taratylyp jatyr.

COVID-19-ǵa qarsy vaktsınalaý Armenııada erikti túrde júrgiziledi. Budan buryn Armenııada «Spýtnık V» vaktsınasynyń synama partııasynan qaýip-qater tobyndaǵy 600 adam ekpe alǵan. 28 sáýirde Armenııaǵa Astra Zenec» vaktsınasynyń alǵashqy partııasy (24 myń doza), 8 sáýir kúni «Spýtnık V» vaktsınasynyń alǵashqy iri partııasy (15 myń doza) jetkizilgen. Azamattardy vaktsınalaýda basymdyq qaýip-qater tobyndaǵy adamdarǵa beriledi: 65 jastan asqandar, 16-64 jas aralyǵyndaǵy sozylmaly aýrýy barlar, egde jastaǵy adamdarǵa qaraý ortalyqtarynyń turǵyndary men qyzmetkerleri.