Armenııada tótenshe jaǵdaı rejımi 13 shildege deıin uzartyldy

EREVAN. QazAqparat – Armenııada koronavırýs ınfektsııasyna baılanysty osy jyldyń naýryz aıynda engizilgen tótenshe jaǵdaı rejımi úshinshi ret uzartyldy. Tıisti sheshim juma kúni Úkimet otyrysynda qabyldandy, dep habarlaıdy QazAqparattyń menshikti tilshisi.

Armenııa Úkimeti juma kúngi kezekten tys otyrysta TJ rejımin úshinshi ret 2020 jyldyń 13 shildesine deıin uzartý týraly sheshim qabyldady.

Úkimet sheshiminde kórsetilgendeı, tótenshe jaǵdaı rejımin uzartý qajettiligine ınfektsııa jaǵdaılarynyń kóbeıýi negiz bolǵan.

«2020 jylǵy 16 naýryzda tótenshe jaǵdaı jarııalaýǵa negiz bolǵan jaǵdaılar joıylmaǵan. Oǵan 12 maýsymda koronavırýs ınfektsııasyn juqtyrýdyń rastalǵan jaǵdaılary týraly derekter dálel. Infektsııany juqtyrý jaǵdaılary sanynyń ósýi jáne odan ári taralýy adamdardyń ómiri men densaýlyǵyna qaýip tóndirýde», - delingen Armenııa Úkimetiniń sheshiminde.

Eldiń Aýrýdy baqylaý jáne aldyn alý ulttyq ortalyǵynyń málimetinshe, 12 maýsymdaǵy jańdaı boıynsha Armenııada 15 281 koronavırýs ınfektsııasyn juqtyrý oqıǵasy tirkelgen. 5 639 patsıent saýyǵyp shyqsa, 9 298 naýqas em qabyldaýda. 258 adam kóz jumǵan.

Koronavırýs ınfektsııasyna baılanysty Armenııada TJ rejımi 16 naýryzda bir aıǵa jarııalanǵan bolatyn.

13 sáýirde Armenııa úkimeti TJ rejımin 14 mamyrǵa deıin, keıinnen 13 maýsymǵa deıin uzartqan edi.

27 mamyrda Armenııa premer-mınıstri Nıkol Pashınıan eldegi jaǵdaıdyń aýyr ekenin aıtyp, indettiń ekinshi tolqyny týraly málimdedi.