Armenııada «Ózara is-qımyl-2017» oqý-jattyǵýy óz máresine jetti

ASTANA. QazAqparat - Búgin  Armenııa Respýblıkasynyń úsh polıgonynda UQShU UJDK jedel-strategııalyq oqý-jattyǵýynyń kezeńderiniń biri bolyp tabylatyn «Ózara is-qımyl-2017» oqý-jattyǵýynyń belsendi fazasy ótti, dep habarlaıdy QR QM baspasóz qyzmeti.

Negizgi is-qımyl Erevan qalasynyń mańynda ornalasqan «Bagramıan» polıgonynda ótti. Munda urysqa engizilgen motoatqysh rotasynyń manevrli qorǵanysynan keıin tankterdiń, artıllerııa men avıatsııanyń qoldaýymen motoatqysh batalony shyǵyp bara jatqan qarsylasty talqandady.

Odan basqa, Reseı Federatsııasynyń arnaıy maqsattaǵy bólimshesiniń kúshimen lańkesterdi joıý jáne kepilge alynǵandardy bosatý jóninde operatsııa ótkizildi. Al taktıkalyq áýe desanty Belarýs pen Qazaqstannyń áskerı kontıngentteri quramynda belgilengen aýdanda mańyzdy shepke ornalasyp, zańsyz qarýly quralymdardyń sheginýin oqshaýlady.

«Ózara is-qımyl-2017» oqý-jattyǵýy - bul áskerlerimizdiń jaýyngerlik sheberligin, koalıtsııalyq toptama quramynda jaýyngerlik is-qımyldardy josparlaý biliktiligin shyńdaý, ózara is-qımyldy uıymdastyrý jáne jan-jaqty qamtamasyz etý baǵytyndaǵy mańyzdy qadam», - dep Qorǵanys mınıstriniń birinshi orynbasary - QR QK Bas shtabynyń bastyǵy general-leıtenant Murat Maıkeev atap ótti.

Oqý-jattyǵý nátıjeleri boıynsha úzdik qatysýshylar medaldarmen, gramotalar jáne estelik syılyqtarmen marapattaldy. «Jaýyngerlik baýyrlastyq-2017» jedel-strategııalyq oqý-jattyǵýynyń kelesi kezeńi «Myzǵymas baýyrlastyq-2017» UQShU bitimgershilik kúshteriniń oqý-jattyǵýy aǵymdaǵy jylǵy qazannyń 16-y men 20-y aralyǵynda «Іle» polıgonynda ótedi.