Armenııada koronavırýsqa qarsy vaktsınalaý sharasy naýryzda bastalady

EREVAN. QazAqparat - Armenııaǵa koronavırýs ınfektsııasyna qarsy vaktsınanyń partııasy kelgeli jatyr. Sonyń izinshe osy jyldyń naýryz aıynda halyqty kezeń-kezeńimen vaktsınalaý bastalady.

Armenııanyń densaýlyq saqtaý mınıstri Anahıt Avanesıan jýrnalısterge bergen suhbatynda osylaı dep málimdedi, dep habarlaıdy «QazAqparat» HAA menshikti tilshisi.

Anahıt Avanesıan Armenııa bıligi elge COVID-19 indetine qarsy vaktsınany jetkizý jónindegi kelissózderdi aıaqtaǵanyn málimdedi.

Onyń aıtýynsha, vaktsına jetkiziletin naqty aqparat belgili bolǵannan keıin bólim vaktsınalaý kestesin jarııalaıdy.

«Bizdiń saraptamalyq top bizge usynylǵan barlyq vaktsınany tekserip, baǵalap jatyr. Mamandarymyz reseılik «Sputnik V» vaktsınasyn qoldanýǵa ruqsat berdi. Jaqyn arada reseılik vaktsınanyń naqty qashan jetkiziletini belgili bolady. Biz qazirdiń ózinde naýryz aıynda halyqty kezeń-kezeńimen vaktsınalaýǵa múmkindik beretin vaktsınalardyń alǵashqy partııasyna ıe bolamyz dep senemiz», - dedi Armenııanyń densaýlyq saqtaý mınıstri.

Mınıstrdiń aıtýynsha, qaýip tobyna jatatyn adamdarǵa basymdyq beriledi. Bul toptar qazirdiń ózinde anyqtalyp qoıǵan. Armenııanyń Densaýlyq saqtaý mınıstrliginiń málimetteri boıynsha birinshi kezeńde qarttar úıindegi adamdar, osy ortalyqtardyń qyzmetkerleri, medıtsına qyzmetkerleri, áleýmettik kómek ortalyqtarynyń qyzmetkerleri, 65-ten asqan adamdar jáne 16-dan 64 jasqa deıingi sozylmaly aýrýlary bar adamdarǵa vaktsına salynady.

Armenpress basylymynyń habarlaýynsha, Armenııa COVAX bastamasymen yntymaqtastyq aıasynda vaktsınany brıtandyq «Astra Zeneca» kompanııasynan da satyp almaq.

Armenııa Densaýlyq saqtaý mınıstrligi Aýrýlardy baqylaý jáne aldyn alý ulttyq ortalyǵynyń málimeti boıynsha, 2021 jyldyń 4 aqpanyna deıin Armenııada koronavırýs ınfektsııasyn 167 568 adam juqtyrǵan. 159 045 naýqas saýyǵyp, 4 637 naýqas emdelýde. 3 107 adam qaıtys boldy.

Avtory: Azamat Álmaǵambetov