Armenııada Qazaqstannyń eksporttyq múmkindikteri tanystyryldy

EREVAN. QazAqparat – Qazaqstannyń eksporttyq múmkindikteri armıandyq bıznesmenderge usynyldy, dep habarlaıdy «QazAqparat» HAA menshikti tilshisi.

Erevanda Qazaqstannyń Armenııadaǵy elshiliginiń bastamasymen «Qazaqstan-Armenııa: múmkindikter eksporty» tanystyrylymy ótti, onyń aıasynda armıan isker toptarynyń ókilderine Qazaqstannyń eksporttyq múmkindikteri men ınvestıtsııalyq tartymdylyǵy tanystyryldy.

«Bizdiń shara Armenııaǵa Qazaqstannyń eksporttyq múmkindikterin kórsetýge arnalǵan. Bir jaǵynan, biz ótken jyldyń qorytyndysyn shyǵaramyz. Ekinshi jaǵynan, talqylaý kezinde ótken jyldardyń tájirıbesin eskere otyryp, biz ózimizdiń bólimderimizge óz jumystaryn naqty baǵytta shoǵyrlandyrýǵa múmkindik berý úshin saýda-ekonomıkalyq yntymaqtastyqtyń bolashaǵyn baǵalaýǵa tyrysamyz. Sondaı-aq, Qazaqstan men Armenııa bıznesine qaı salalarda jyldam jáne neǵurlym tıimdi jumys isteýge bolatyndyǵyn aıta alamyz», - dep atap ótti Qazaqstannyń Armenııadaǵy Elshisi Tımýr Orazaev óz sózinde.

Sharaǵa Armenııa isker toptarynyń, Armenııanyń mınıstrlikteri men vedomstvolarynyń, armıandyq «Shaǵyn jáne orta bıznestiń yntymaqtastyǵy qaýymdastyǵy», «Armenııanyń kólik ekspedıtorlary qaýymdastyǵy», armıan sarapshylary qaýymdastyǵy men jergilikti BAQ ókilderi qatysty. Olardyń nazaryna Qazaqstannyń ınvestıtsııalyq jáne eksporttyq múmkindikteri týraly tanystyrylym usynyldy.

Kezdesý barysynda onyń qatysýshylary men Qazaqstannyń Armenııadaǵy Elshisi Tımýr Orazaev arasynda ashyq dıalog ótti. Onda qazaqstandyq naryqtyń ınvestıtsııalyq múmkindikteri, memlekettik baǵdarlamalar men Qazaqstandaǵy bıznesti qoldaý sharalary, birlesken kásiporyndardyń bolashaǵy, sondaı-aq logıstıkalyq sheshimder týraly keń aýqymdy máseleler talqylandy.