Armenııada «Abaı-175» jınaǵy tanystyryldy
QR Syrtqy ister mınıstrliginiń s aıtyndaǵy materıaldarǵa qaraǵanda, qazaqtyń uly aqyny men oıshyly Abaı Qunanbaevtyń 175-jyldyǵyna oraı armıan tilinde «Abaı-175» atty mereıtoılyq jınaǵynyń tusaýkeseri beınekonferentsııa formatynda ótti. Atalǵan jınaq eki kitaptan turady. Olar «Qara sózder» men Muhtar Áýezovtiń jańartylǵan redaktsııasyndaǵy «Abaı joly» atty romany.
Ádebı jınaq «Rýhanı jańǵyrý» baǵdarlamasy aıasynda Qazaqstannyń Armenııadaǵy Elshiliginiń bastamasymen Erevan memlekettik ýnıversıteti men belgili «BZEZ» baspasynyń qoldaýymen jaryq kórdi.
Іs-sharany ashqan Qazaqstannyń Armenııadaǵy Elshisi Tımýr Orazaev óziniń sózinde M.Áýezovtiń «Abaı joly» romany alǵashqy ret armıan tilinde sonaý 1952 jyly jaryq kórip bıblıografııalyq sırek kezdesetin shyǵarmaǵa aınalǵany týraly atap ótti.
Onyń aıtýynsha, qazirgi jańartylǵan, armıan tilindegi ekinshi shyǵarylym, shyǵarmashylyq toppen jańa tildik redaktsııasynda, sondaı-aq redaktorlardyń tarıhı-fılologııalyq jazbalarymen qosa, qazirgi armıan tiliniń qaǵıdalaryna saı jasalypty.
Armenııanyń Bilim, ǵylym, mádenıet jáne sport mınıstriniń orynbasary Artýr Martırosıan óziniń quttyqtaý sózinde Abaı qazaqtyń uly dalasynda birinshi jáne teńdessiz zaıyrly aqyn ekenin atap ótti.
«Abaıdyń ádebı shyǵarmasy bir ýaqytta óziniń teńdessiz ári biregeıligimen úlken áser qaldyrdy»-dedi A.Martırosıan.
Al sharanyń aldynda Ulttyq Jınalys depýtaty, «Qazaqstan-Armenııa» dostyq tobynyń múshesi Arman Abovıan: «Abaı maǵan óziniń dúnıetanymymen, fılosofııasymen jaqyn. Ol óziniń oı-syrlary men eńbekterinde shartty Batys pen Shyǵysty baılanystyrdy», - dedi.
Qazaqstan Jazýshylar odaǵy tóraǵasynyń orynbasary Baýyrjan Jaqyp qatysýshylardyń nazaryn Abaıdyń alǵashqy armıan tilindegi «Qara sózderine» aýdardy. Osylaısha, Armenııadaǵy oqyrmandary men álemdegi mıllıondaǵan armıan dıasporasyna qazaqtyń uly aqyny jáne oıshylynyń fılosofııalyq prozasymen tanysýǵa múmkindik berdi.
Qazaqstan Respýblıkasy Syrtqy ister mınıstrliginiń Erekshe tapsyrmalar jónindegi Elshisi Batyrhan Qurmanseıit armıan tarapyn Abaıdyń shyǵarmalaryn aýdarý barysynda kórsetken qajyrly eńbegi úshin alǵys bildire otyra, jınaqtyń bolashaqta armıandyq ǵylymı orta men stýdenttik toptar úshin qundy ádebı shyǵarma bolatynyn aıtty.
Jınaqty jaryqqa shyǵarý maqsatynda ter tókken armıan jáne qazaqstandyq mamandar boldy. Ásirese túrkitanýshy, professor Aleksandr Safarıan, aýdarmashy Arman Safarıan, aqyn-aýdarmashy Varýjan Hastýrdyń enbekteri óte zor. Al shyǵarylym úshin arnaıy sýretter qazaqstandyq sáýletshi Nurlan Boranbaevtyń qolynan shyqty.
«Aldaǵy ýaqytta atalǵan kitaptar Armenııanyń jetekshi kitaphanalary men ýnıversıtetterine, sondaı-aq qazaqstandyq ǵylymı uıymdarǵa, qorlarǵa, ýnıversıtetterge jetkiziledi. Sondaı-aq, kúzde armıan tilinde «Abaı-175» jınaǵynyń nusqasy elektrondyq tuǵyrnamalary - Kindle, iOS jáne Android úshin shyǵarý josparlanýda»,-delingen taratylǵan aqparatta.