Armenııa sarapshylary Qazaqstannyń damýyn talqylady

<p>ASTANA. KAZINFORM &ndash; Qazaqstannyń Armenııadaǵy Elshiliginde el sarapshylarynyń, jýrnalıstik, iskerlik jáne saıası toptarynyń ókilderimen kezdesý ótti. Dóńgelek ústelge qatysýshylar qazirgi Qazaqstannyń damý máselelerin talqylap, ekijaqty kún tártibi boıynsha pikir almasty.</p>

Qazaqstannyń Armenııadaǵy Elshisi Bolat Imanbaev dóńgelek ústelge qatysýshylardy Qazaqstandaǵy saıası, áleýmettik-ekonomıkalyq jáne demokratııalyq reformalar keshenin iske asyrý protsesi, adam quqyqtaryn nyǵaıtý sharalary týraly baıandady. Olar Qazaqstan Prezıdenti Qasym-Jomart Toqaevtyń bıylǵy 3 qańtardaǵy Egemen Qazaqstan gazetine bergen suhbatynyń negizgi mazmunymen tanysty.

Sondaı-aq, qonaqtarǵa Qazaqstannyń 2023 jylǵy túrli sektorlaryndaǵy negizgi nátıjeler men qorytyndylar týraly, adam quqyqtaryn qorǵaý jónindegi naqty sharalar, Qasym-Jomart Toqaev prezıdenttiginiń qorytyndylary týraly kórneki materıaldar usynyldy.

Armıan sarapshylary Qazaqstan basshylyǵynyń demokratııalyq qaǵıdattarǵa, ortaq maqsattarǵa birlesip qol jetkizý, adam quqyqtaryn qamtamasyz etý, qalyptasqan teris dástúrlerdi joıý maqsatynda qoǵamdy biriktirýge berik ekenin atap ótti.

«HHІ ǵasyr – múmkindikter ǵasyry. Qazaqstan kóshbasshy elder tiziminde bolýǵa tolyq quqyǵy bar ekenin dáleldedi. Tabystyń kilti – halyqtyń yntymaǵy. Óńirler men ınfraqurylymdy damytý boıynsha reformalar da erekshe áser qaldyrdy», - dep «Alternatıva» taldaý ortalyǵynyń basshysy, saıası ekonomıka salasyndaǵy sarapshy Tatýl Manaserıan Qazaqstanǵa saparyn qorytyndylady.

Jahandaný jáne yntymaqtastyq jónindegi taldaý ortalyǵynyń basshysy Stepan Grıgorıannyń pikirinshe, Qazaqstannyń demokratııalyq memleket qurý jolyndaǵy jetistikteri jiger beredi.

«Qazaqstan Prezıdenti psıhologııany ózgertip, memlekettiń damýyna teris áser etken teris dástúrlerdi joıyp keledi. Mańyzdy demokratııalyq reformalar júrgizilip keledi. Al Ulttyq quryltaı – ejelgi dástúrlerdi saqtaıtyn qundy dıalog alańy», - dep atap ótti sarapshy.

Іs-shara aıasynda «Qańtar. Memlekettik tóńkeris áreketi» derekti fılmi kórsetildi. Al kezdesýdiń sońǵy bóliginde ózara qyzyǵýshylyq týdyrǵan ekijaqty kún tártibi boıynsha pikirtalas ótti.