Armenııa Parlamenti taratylady

EREVAN. QazAqparat - Armenııa Parlamentine depýtattyq saılaýdyń ekinshi kezeńiniń qorytyndylary boıynsha el premer-mınıstri saılanǵan joq. Endi, Konstıtsııaǵa sáıkes, qazirgi Parlament taratylady. Merziminen buryn parlamenttik saılaý aǵymdaǵy jyldyń jeltoqsan aıynda ótkiziledi, dep habarlaıdy «QazAqparat» tilshisi. 

Parlamentte premer-mınıstrdi saılaýǵa qatysty daýys berýdiń ekinshi kezeńi 1 qarashada ótedi.

1 qarasha kúni Armenııanyń Ulttyq jınalysynyń (Parlament) arnaıy otyrysynda premer-mınıstrdi saılaýǵa qatysty daýys berýdiń ekinshi kezeńin ótkizý máselesi talqylandy.

Ondaǵy jalǵyz kandıdat - Armenııa premer-mınıstriniń mindetterin atqarýshy, «Elk» fraktsııasy, «Tsarýkıan» blogy jáne birqatar táýelsiz depýtattar usynǵan Nıkol Pashınıan edi. Daýys berý qorytyndylary boıynsha Pashınıannyń kandıdatýrasyn eshkim qoldamady.

Premer-mınıstrdi saılaýdyń birinshi týry aǵymdaǵy jyldyń 24 qazanynda ótti. N.Pashınıan onda da jalǵyz kandıdat bolǵan. Daýys berý aldynda sóz sóılegen N.Pashınıan depýtattardy oǵan daýys bermeýge shaqyryp, onyń kandıdatýrasyn usyný tek tehnıkalyq sıpatta ótip jatqanymen túsindirgen. «Armenııanyń respýblıkalyq fraktsııasy», «Dashnaktsýtıýn jáne «Tsarýkıan» blogy» ARF daýys berýdiń aldynda oǵan qatyspaıtynyn málimdedi. «Elk» fraktsııasynyń depýtattary qalys qalatynyn málim etken. Aqyry Pashınıan úshin bir depýtat daýys berse, 11-i qalys qalyp, qarsy eshkim daýys bergen joq.

Eske salsaq, 16 qazanda Armenııa úkimeti otstavkaǵa ketken edi.