Armenııa Palestınany moıyndady

<p>ASTANA. KAZINFORM &ndash; Armenııa Respýblıkasy Birikken Ulttar Uıymy Bas Assambleıasynyń Gaza sektoryndaǵy atysty dereý toqtatýǵa shaqyratyn qararyna qosyldy. Armenııa árqashan Palestına máselesin &laquo;eki memleket&raquo; qaǵıdasy negizinde beıbit jáne jan-jaqty retteýdi jaqtap keldi. Bul týraly Armenııa Syrtqy ister mınıstrliginiń málimdemesinde aıtylǵan.</p>

«Armenııa Respýblıkasy Taıaý Shyǵysta beıbitshilik pen turaqtylyq ornatýǵa, evreı jáne palestınalyq halyqtar arasynda uzaqmerzimdi beıbitshilik ornatýǵa shyn nıetpen múddeli. Túrli halyqaralyq platformalarda biz árqashan Palestına máselesin beıbit jáne jan-jaqty retteýdi jaqtap keldik jáne Izraıl-Palestına qaqtyǵysyn «eki memleket» qaǵıdasy negizinde sheshýdi qoldaýdy jalǵastyramyz. Biz bul palestınalyqtar men ızraıldikterdiń zańdy tilekterin júzege asyrýyna kepildik beretin jalǵyz jol ekenine senimdimiz. Joǵaryda aıtylǵandardyń negizinde Armenııa Respýblıkasy halyqaralyq quqyqty, halyqtardyń teńdigi, egemendigi jáne beıbit qatar ómir súrý qaǵıdattaryn ustanatynyn rastaıdy jáne Palestına memleketin tanıdy», - delingen Armenııa SІM málimdemesinde.

Málimdemede Gaza sektoryndaǵy apatty gýmanıtarlyq jaǵdaı men búgingi kúni jalǵasyp jatqan áskerı qaqtyǵystyń halyqaralyq kún tártibindegi sheshýdi qajet etetin basty máselelerdiń qatarynda ekeni atap kórsetildi. Armenııa Respýblıkasy qarýly qaqtyǵystar kezinde azamattyq ınfraqurylymǵa shabýyldardy, beıbit turǵyndarǵa qarsy zorlyq-zombylyqty, beıbit turǵyndardy kepilge alýdy jáne tutqynǵa alýdy úzildi-kesildi qabyldamaıdy. Sondaı-aq halyqaralyq qoǵamdastyqtyń olardy aldyn ala sharttarsyz bosatý týraly talaptaryna qosylady.