Armenııa men Qyrǵyzstan kólikterin Qazaqstanǵa kirgizýdiń sharttary qandaı

NUR-SULTAN. QazAqparat – QR Qarjy mınıstrligi Memlekettik kirister komıtetiniń saýdalyq emes aınalymdar basqarmasynyń bas sarapshysy Nurlan Namysov Reseıden Aremnııa men Qyrǵyzstannan kólik tasymaldaýdyń kedendik tártibi týraly túsinikteme berdi, dep habarlaıdy QazAqparat tilshisi.

Onyń aıtýyna qaraǵanda, Armenııa, Qyrǵyzstan avtokólikterine kelsek, olardy paıdalaný EAEO sheńberine qosylý shartymen retteledi.

«Armenııa Respýblıkasynyń avtokólikteri 2014 jyldyń 10 qazanyna deıingi ýaqytta ákelingen bolsa, odaqtyń taýary bolyp sanalady. Ondaı kólikterdi qazaqstandyqtar kedendik baj ben salyqsyz alyp kele alady. Al Qyrǵyzstan Respýblıkasyna keletin bolsaq, 2014 jylǵy 1 qańtarǵa deıingi kólik quraldary EAEO taýary bolyp sanalady. Olardy da kedendik bajdar men salyqtarsyz ákelýge bolady. Al Armenııadan 2014 jyldyń 10 qazanynan 2020 jyldyń 1 qańtaryna deıin ákelingen kólikter sheteldik taýar bolyp sanalady. Olar boıynsha kedendik baqylaý bar. Olardy ákelgen jaǵdaıda kedendik bajdar men salyqtardy tóleý kerek. Sondaı-aq memlekettik tirkeýge qoıǵan kezde tirkeý alymdary men ýtıl alymyn tóleý qajet bolady», - dedi Nurlan Namysov

Dál osyndaı talap Qyrǵyz elinen keletin kólikterge de qoıylyp otyr.

«Qyrǵyz elinen ákelinetin kólikter boıynsha aıtsaq, 2014 jyldyń 1 qańtarynan 2020 jyldyń 1 qańtaryna deıin ákelingen kólikter kedendik bajdar men salyqtar tóleý aqyly ákelinedi. Olardyń bári kedendik baqylaýda bolyp sanalady», - dedi komıtettiń sarapshysy.