Armenııa men Ázerbaıjan beıbit kelisimniń tolyq mátinin áli kelisken joq

<p>ASTANA. KAZINFORM &mdash; Armenııa men Ázerbaıjan beıbit kelisim jobasynyń barlyq tarmaqtary boıynsha áli kelisimge kelgen joq. Armenııa qysqa merzimde mátindi kelisý úshin baılanystardy jandandyrýǵa múddeli. Bul týraly Armenııa Syrtqy ister mınıstriniń orynbasary Vaan Kostanıan málimdedi, dep habarlaıdy Kazinform menshikti tilshisi.</p>

«Qazirgi ýaqytta kelisim jobasynyń barlyq tarmaqtary boıynsha túpkilikti kelisim joq. Kelisilmegen máseleler boıynsha kelissózder áli de jalǵasyp jatyr», — dep atap ótti V.Kostanıan. 

Onyń aıtýynsha, qazirgi ýaqytta syrtqy saıası vedomstvo basshylary nemese memleket basshylary deńgeıinde kezdesý ótkizý týraly naqty kelisim joq. Biraq armıan tarapy beıbit kelisim mátini boıynsha kelisimdi tez arada aıaqtaý múmkindigin qamtamasyz etý úshin kezdesýlerdi jandandyrýǵa múddeli.

5 qarashada Armenııa Syrtqy ister mınıstrligi Erevan beıbit kelisim jobasynyń mátini boıynsha Ázerbaıjan tarapynan jaýap usynystaryn (11-shi basylym) alǵanyn habarlady. Baký osy jyldyń tamyz aıynyń sońynda Erevan jibergen joba mátini boıynsha usynystarǵa jaýap berdi.

Buǵan deıin Armenııa premer-mınıstri Nıkol Pashınıan kelisim jobasy negizinde Ázerbaıjanmen beıbit kelisimge qol qoıýǵa daıyn ekenin bildirdi. 

Keıin Ázerbaıjan Syrtqy ister mınıstrligi baspasóz qyzmetiniń jetekshisi Aıhan Gadjızade jergilikti BAQ ókilderine bergen suhbatynda Armenııa usynǵan tásil — qazirgi kezde kelisilgen erejelerge ǵana negizdelgen beıbit kelisimge qol qoıý Baký úshin tıimsiz ekenin málimdedi.