Armenııa Qazaqstannyń munaı ónimderin ımporttaý týraly kelisim jobasyn maquldady
Beısenbi kúni Armenııa mınıstrler kabıneti «Qazaqstannyń munaı ónimderin Armenııaǵa jetkizý salasynda Armenııa men Qazaqstan úkimeti arasyndaǵy saýda-ekonomıkalyq yntymaqtastyq týraly» kelisim jobasyn maquldady.
Armenııanyń aýmaqtyq basqarý jáne ınfraqurylym mınıstri Sýren Papıkıan bul kelisim taraptardyń munaı ónimderin jetkizý salasynda ózara qyzyǵýshylyq tanytýyna baılanysty jasalǵanyn atap ótti.
«Osy kelisim eki el arasyndaǵy ózara tıimdi yntymaqtastyqqa, saýda-ekonomıkalyq baılanystardy damytý úshin qolaıly jaǵdaılar jasaýǵa, iskerlik belsendilikti arttyrýǵa yqpal etpek», - dep málimdedi mınıstr Papıkıan otyrys barysynda.
Óz kezeginde, vıtse-premer Tıgran Avınıan Qazaqstannyń munaı ónimderin jetkizý - Armenııanyń otyn naryǵyna oń yqpal etetinin atap ótti.
«Bul óte mańyzdy kelisim ekenin atap ótken jón. Kelissózder bir jarym jyl boıy júrgizildi. Bul kelisimge qol qoıylǵannan keıin Armenııa Qazaqstan otynyn tıimdi jaǵdaıda jetkizýdi uıymdastyryp, sonyń arqasynda Armenııa naryǵynda básekelestik týdyrady», - dedi vıtse-premer Avınıan.
Armenııa premer-mınıstri Nıkol Pashınıan Armenııada munaı ónimderi naryǵynda monopolııalyq qubylystardyń azaıǵany baıqalsa da, olar áli de tolyq joıylmaǵanyn atap ótti.
«Biz adamdardyń sapaly jáne barynsha qoljetimdi ónimderdi alýy úshin kez kelgen monopolııanyń, sonyń ishinde jasandy monopolııanyń qalyptasýyna jol bermeýimiz kerek», - dep málimdedi premer-mınıstr.
Avtory: Azamat Álmaǵanbetov