Armenııa densaýlyq mınıstrligi elde vaktsınalaý qalaı júrip jatqany týraly aıtty

EREVAN. QazAqparat – «Spýtnık V» vaktsınasyn alǵan Armenııa azamattarynda oqys saldary tirkelgen joq. Bul týraly Armenııa Densaýlyq saqtaý mınıstrligi janyndaǵy aýrýlardy baqylaý jáne aldyn alý jónindegi ulttyq ortalyqtyń ınfektsııalyq emes aýrýlar jáne nozokomıaldy ınfektsııalar epıdemıologııasy bóliminiń bastyǵy Romella Abovıan aıtty, dep habarlaıdy QazAqparat tilshisi.

Armenııa buǵan deıin Reseıden Spýtnık V vaktsınasynyń synaq partııasyn (2 myń doza) aldy. Vaktsınany azamattardyń shaǵyn toby – medıtsına qyzmetkerleri men qater tobyndaǵy 600 adam alǵan bolatyn.

Armenııanyń Densaýlyq saqtaý mınıstrligi Spýtnık V vaktsınasyn qoldanýdyń kútpegen saldary tirkelmegenin aıtty.

Armenııa azamattary COVID-19-ǵa qarsy vaktsınany óz erikterimen alady. Buǵan deıin Armenııaǵa «Spýtnık V» vaktsınasynyń synaq partııasy, al 28 naýryzda Covax Facility bastamasy aıasynda satyp alynǵan Astra Zeneca vaktsınasynyń alǵashqy partııasy (24 myń doza) jetkizildi. El azamattaryn vaktsınalaý kezinde basymdyq qater toptaryna beriledi: medıtsına qyzmetkerlerine, 65 jastan asqan adamdarǵa, sozylmaly aýrýlary bar 16 jastan 64 jasqa deıingi patsıentterge, qart adamdarǵa kútim jasaý ortalyqtarynyń turǵyndaryna jáne qyzmetkerlerine.