Armatýramen uryp óltirgen: Shymkent polıtseıleri eki jyl burynǵy qylmystyń betin ashty

ShYMKENT. QazAqparat – Shymkent polıtseıleri eki jyl buryn bolǵan adam óltirý qylmysynyń betin ashty, dep habarlaıdy QazAqparat Polisia.kz-ke silteme jasap.

2021 jyly Eńbekshi aýdanynyń polıtsııa basqarmasyna 32 jastaǵy ulynyń joǵalyp ketkeni týraly jergilikti turǵyn habarlasty. Anasy er adamnyń eki apta buryn úıden shyǵyp, qaıtyp oralmaǵanyn aıtqan. Habar-osharsyz ketken azamattyń júrgen jerin anyqtaý maqsatynda krımınaldyq polıtsııa qyzmetkerleri keshendi sharalar júrgizdi.

Tártip saqshylary onyń otbasy múshelerinen, kórshilerinen, dostarynan saýalnama júrgizip, jaqyn mańdaǵy beınebaqylaý kameralarynyń jazbalaryn tekserdi. Er adamnyń syrtqy kelbetin sıpattaıtyn baǵdarlar qalalyq Polıtsııa departamenti basqarmalaryna, sondaı-aq elimizdiń barlyq aımaǵyndaǵy polıtsııa bólimderine joldandy.

2 jyl boıy izdestirý jumystary nátıjesiz bolǵanymen, osy jyldyń basynda jedel qyzmetkerler osy derek boıynsha ilmek taba aldy. Kezdeısoq kýágerdiń jaýabyna sáıkes, azamattyń joǵalyp ketýine inisiniń qatysy bar bolǵan. Qabyldanǵan sharalar nátıjesinde otbasylyq janjal barysynda ol týysyn basynan armatýramen birneshe ret uryp, óltirgeni anyqtaldy. Bul iske ol ógeı aǵasynyń mas kúıinde anasymen janjaldasatyny ıtermelegen.

Asa aýyr qylmystyń izin jasyrý úshin qaskúnem máıitti syrttaǵy dárethanaǵa tastap, shuńqyrdy betonmen toltyryp, ústine shaǵyn saraı turǵyzǵan.

Kúdikti qamaýǵa alyndy. Eńbekshi APB-nyń tergeýshileri qylmystyq isti aıyptaý aktisimen sotqa joldady.