Arman Júdebaev: Bul saılaý - Qazaqstan úshin syndarly jańa kezeńniń bastaýy bolmaq
Arman Júdebaev aldaǵy saılaýǵa qatysty Prezıdent sheshimin eldegi saıası-áleýmettik turaqtylyqty saqtaý maqsatynda qabyldanyp dep sanaıdy.
«Memleket basshysy Qasym-Jomart Toqaev 2019 jyldyń 9 maýsymynda elimizde kezekten tys Prezıdent saılaýyn ótkizý týraly sheshimin jarııalady. Prezıdent óz sózinde aıtqandaı, Úkimet, Parlament jáne partııa basshylarymen aqyldasa otyryp sheshken sheshimi eldegi tynyshtyqty, saıası-áleýmettik turaqtylyqty saqtaý maqsatynda qabyldanyp otyr dep esepteımiz. Demokratııalyq qoǵamda retimen, tártibimen bolatyn bul saılaý Qazaqstan úshin syndarly jańa kezeńniń bastaýy bolmaq!», - dedi Arman Júdebaev.
Onyń aıtýynsha, Prezıdenttiń ıgi bastamalaryna halyq qoldaý bildirýi kerek.
«Qasym-Jomart Toqavetyń Tuńǵysh Prezıdentimiz - Elbasynyń qasynda senimdi serigi, ári izbasar kómekshisi bolyp kóp jyldar qyzmet atqaryp kelgeni málim. Ǵylym men tehnologııanyń qarqyndy damýy, qazirgi zamandaǵy álemde bolyp jatqan áleýmettik-ekonomıkalyq, ekologııalyq, mádenı jáne saıası ózgerister bizge kóptegen talaptardy qoıyp otyr. Sol sebepti el basqarý isinde mol tájirıbe jınap, el ishindegi máselelerge qanyq bolyp júrgen Prezıdentimizdiń ıgi bastamalaryna halyq bolyp qoldaý bildirýimiz kerek dep esepteımin», - dedi Arman Júdebaev.
Ol elimizdegi turaqtylyqtyń kepili bolyp otyrǵan qazirgi ustanǵan baǵytymyz jalǵasyn tabady dep oılaıtynyn jetkizdi.
«Táýelsizdigimizdiń nyǵaıýy, onyń baıandy bolýy úshin elimizdegi saıası turaqtylyq pen ekonomıkamyzdyń úzdiksiz damýy aýadaı qajet. El birligi men beıbitshiligi - basty qundylyǵymyz! Halqymyzdyń negizgi maqsat-muraty osy ekeni barshaǵa aıan. Beıbit, toqshylyq zaman bolmaı óner-bilim, mádenıettiń de damýy ekitalaı. Sondyqtan respýblıkamyzdaǵy turaqtylyqtyń kepili bolyp otyrǵan qazirgi ustanǵan baǵytymyz jalǵasyn tabady dep oılaımyn. Bul saılaý - eldegi beıbitshilik pen kelisimdi saqtaı otyryp, áleýmettik-saıası jańǵyrýǵa, álemniń úzdik elderi qataryna qosylý jolynda jańa demokratııalyq erkin bolashaqty qurýǵa múmkindik bermek», - dedi Arman Júdebaev.