Arman Qalyqov: Shahtalar ajal oshaǵyna aınalmasyn desek, ınvestorǵa ıkemdelgen zańnamany ózgertý kerek
Depýtat «ArselorMıttal Temirtaý» kásipornymen Úkimet arasyndaǵy ınvestıtsııalyq áriptestik úzilgennen keıin bul orynǵa reseılik ınvestorlar kelýi múmkin» degen boljamǵa senbeıtinin aıtady.
«Meniń oıymsha, ondaı boljamdar men baıbalamdar negizsiz. Jalpy bul kásiporyndy memleket menshigine qaıtarý kerek. Kómir óndirisi ejelden dotatsııalyq sala bolyp esepteledi. Sotsıalıstik menshikti de, kapıtalıstik menshikti de kórdik. Biraq qaı kezde de bul sala dotatsııalyq boldy. Endi sondaı dotatsııalyq óndiriske taǵy bir jeke menshik kompanııany ákelsek ne bolady? Investordyń maqsaty – tabys. Ol tabys tabý úshin únemdeýge kóshedi. Al únemdeýdiń saldary eńbek qaýipsizdigine, ekologııaǵa keri áser etýi múmkin. Men búkil álemde dotatsııalyq sala bolyp esepteletin kómir óndirisi Mıttal úshin ǵana tabysty bolǵanyna senbeımin. Demek, ol eńbek qaýipsizdigi sııaqty mindetterden únemdep otyrǵan degen sóz. Erteń ornyna basqa bir jeke ınvestordy ákelgende onyń da dál solaı etpesine kim kepil? Sondyqtan bul oryndy Úkimet óz qolyna alý kerek», - deıdi Arman Qalyqov.
Áleýmettik jelide «ArselorMıttal Temirtaýǵa» qarasty shahtada buǵan deıin bolǵan apattardy eske alyp jatqandar kóp. «Úkimet sońǵy apattan keıin jyldam áreket etip, josyqsyz ınvestormen baılanysty úzip úlgergende mundaı qaıǵyly oqıǵa qaıtalanbas edi» degen pikir bar. Májilis depýtaty bul paıymmen ishinara ǵana kelisip otyr.
«Arselor Mıttaldyń» sońǵy oqıǵadan tıisti sabaq almaǵanyn senimdi túrde aıta alam. Al Úkimet týraly olaı aıtaıyn desem, máselemen shuǵyldandy ǵoı. Josyqsyz ınvestorǵa barynsha qysym jasap, problemany sheshýdiń jolyn usynyp baqty», - deıdi ol.
Qazaqstan Úkimeti «ArselorMıttal Temirtaý» kásipornynyń túpki benefıtsıary, mıllıarder Lakshmı Mıttaldyń jeke ózin jaýapqa tarta ala ma? Depýtat bul suraqtyń jaýabyn da qysqa qaıyrdy.
«Bul endi halyqaralyq kún tártibindegi másele. Oǵan menen góri Úkimet, onyń ishinde Premer-Mınıstr jaqsy jaýap bere alady dep oılaımyn. Sondyqtan ol jaıynda pikir bildirgenim artyq bolady. Men ózim óndiris adamymyn, taý-ken ınjenerimin. Sondyqtan ózim biletin dúnıeni ǵana aıtamyn», - deıdi Arman Qalyqov.
Májilis ókili qazirgi ınvestordyń óndiris uıymdastyrýdaǵy qyrsyzdyǵyna qarap shahtany jaýyp tastaýǵa bolmaıtynyn aıtady.
«Bul jerde 1,5 myń adam jumys isteıdi. Olardyń qolyna tutas bir úı qarap otyr. Ár shahterdiń otbasynda áıeli men jalǵyz balasy bar degenniń ózinde 5 myń adamdy nápaqasyz qaldyramyz. Sondyqtan bul jerde basqasha fılosofııa bolý kerek. Shahtany jabý emes, ondaǵy eńbek qaýipsizdigin qamtamasyz etý degen másele qoıylý kerek. Bizde sovet zamanynan beri eshteńe ózgergen joq qoı. Sol tehnologııa, sol qurylǵylar... Bári sovettiki. Karerler, konveıerlik lentalar, shahtany tireý quraldary, bári sovet tehnologııasynan qalǵan. Sovet tehnologııasy men quraly adamdy kóp qajet etetin. Investor ondaı kóp adam ustaǵysy kelmegen soń eńbek qaýipsizdigi ekinshi kezektegi máselege aınalyp shyǵa kelgen joq pa? Al birinshi orynǵa óndiris pen tabys shyqty», - deıdi taý-ken mamany.
Sondaı-aq, ol máseleniń saldarymen emes, sebebimen kúresý úshin zańnamany qaıta qaraý kerek degen paıym aıtty.
«Azamattyq kodeks, Kásipkerlik kodeksi, Eńbek kodeksi bar. Ondaǵy qujattardyń bárin qaıta qaraý kerek. Ondaǵy baptardyń bári iri ınvestorlarǵa qolaıly etip jasaldy ǵoı. Solaı emes pe? Shahtalar ajal oshaǵyna aınalmasyn desek, ınvestorǵa ıkemdelgen zańnamany ózgertý kerek. Sondyqtan men apat bolǵan óndiris oshaǵyn Úkimet óz basqarýyna alyp, zańnamany eńbek qaýipsizdigin saqtaıtyndaı etip qatańdatýdy usynamyn. Máseleni sheshimi osynda», - deıdi Májilis depýtaty.
Eske salsaq, búgin saǵat 2:33-te Qaraǵandy oblysyndaǵy Kostenko atyndaǵy shahtada órt shyqqan bolatyn. Sońǵy málimetterdi myna jerden oqı alasyz.