«Arman! Eńbek! Senim! Órkendeı ber, týǵan elim!» - respýblıkalyq basylymdarǵa sholý

ASTANA. 17 qarasha. QazAqparat - QazaqAqparat agenttigi respýblıkalyq basylymdarda 17 qarasha, senbi kúni shyqqan ózekti materıaldarǵa sholýdy usynady.

***

Keshe elordadaǵy «Sa­ry­arqa» velotrek sport ke­she­ninde «Nur Otan» halyq­tyq-demokratııalyq partııa­sy «Jas Otan» jastar qa­na­tynyń ІІ sezi ótti. Sezde Qazaqstan Res­pýb­lıka­sy­nyń Prezıdenti, «Nur Otan» HDP Tóraǵasy Nursultan Nazarbaev sóz sóıledi.  «Arman! Eńbek! Senim!» urany boıynsha ótken jıynǵa ob­lystyq, qalalyq, aýdandyq bastaýysh uıymdarynan saı­­lanǵan 1200-ge jýyq delegat, Parlament depýtattary, Prezıdent Ákimshi­li­gi­niń jaýapty qyzmetkerleri, Úkimet músheleri qatysty. Osy alqaly jıyn arqaý bolǵan maqala «Egemen Qazaqstan» gazetinde «Arman! Eńbek! Senim! Órkendeı ber, týǵan elim!» degen taqyryppen berildi. «Biz - qazaqpyz. Men keshe aıttym ǵoı, 11 mıllıon qazaq barmyz dep. Al endi sol qazaqty bóle bersek, biz el bola almaımyz. Ár taıpany bir-birine qarsy qoıyp, ár sultandy, árbir baı, bolysty bir-birine jaý kórgizip qurǵan saıasat ar­qy­ly bizdi ózgeler bılegen. Osyn­daı qýlyqpen halqymyzǵa qarsy áreket jasaǵan. Sondyqtan tá­ýel­sizdigimiz qolymyzdaǵy kezde biz bir halyq, bir ulttyń balasy ekenimizdi eshqashan oıymyzdan shyǵarmaýymyz kerek. Bizdiń qanymyz bir, syrtta júrsek te, ishte júrsek te osyny umyt­paıyq. Biz­diń elimiz birlikti tý etedi. Olar - Qazaqstan azamattary», - dedi jıyn barysynda Elbasy.

Aıtýly ǵalym, tehnıka ǵylymdarynyń doktory, professor, RǴA-nyń múshe-korrespondenti Abaı Tursynov Máskeý qalasyndaǵy joǵary oqý oryndarynda dáris berdi. Sonda úılendi, bala-shaǵaly boldy. Biraz jyl buryn Almatyǵa qonys aýdaryp, zeınette bolsa da, ǵylym salasynda áli de eńbek etýde. Týyp-ósken jeri Tashkenttiń irgesindegi kil qazaqtar mekendegen (keıin «Jańa jol» aýdany atanǵan) Qaýynshy aýyly. Balalyq shaǵy soǵyspen tuspa-tus kelgen Abaı sol shaqtardaǵy alapat aýyrtpalyqtar men basqa da kórgen-bilgen, bastan ótken mashaqattaryn orys tilinde hatqa túsirip júredi, aýyzeki de baıandaıdy. Mine osy azamattyń kisi óltirý, tonaý, qaraqshylyq, qyr qazaqtarynyń kek qaıtarý tásilderin baıandaıtyn ózi kýá bolǵan, qospasyz áńgimeleriniń bir parasy «Egemen Qazaqstan» gazetinde «Soǵystan sońǵy soıqandar» degen taqyryppen jaryq kórgen.

***

«Shyǵys Qazaqstan oblysy Aıyrtaý aýdanynyń turǵyndary tabıǵattyń tosyn tańǵajaıybyna tap boldy», - dep jazady «Ekspress K» gazeti. Basylymnyń jazýynsha, 30 metrlik qarapaıym skvajınadan tosyn ystyq sý aǵa bastaǵan. Sýdyń bastapqy temperatýrasy 25 gradýs bolsa, qazirgi ýaqytta 40-qa jetip otyr. Buǵan qosa dál qasyndaǵy kelesi qudyqtan muzdaı sý aǵyp tur. Biraq onyń tereńdigi ne bári 6 ǵana metr. Tolyǵyraq «O, teplenkaıa poshla» degen taqyryptaǵy maqaladan bile alasyzdar.

***

Almaty metropolıteni Hyundai Rotem kompanııasyna qatysty sotqa júgindi. Óıtkeni olardyń shyǵarǵan poıyzy  buzylyp qalǵan bolatyn. «Vremıa» gazetiniń jazýynsha, sońǵy sátke deıin ońtúsikkoreılik kompanııa poıyzdyń buzylý faktisin moıyndamaı kelgen.

Eki apta buryn Hyundai poıyzy tosynnan toqtap qalǵan bolatyn. Sonyń saldarynan júzdegen almatylyqtar barar jerine keshikken edi. Bastapqyda Hyundai mamandary qazaqstandyq tehnıkterdi poıyzdy durys paıdalanǵan joq dep aıyptaǵan-dy. Degenmen kelisimshart boıynsha tehnıkalyq qyzmet kórsetý kepili 3 jyldy quraıdy. Osy aralyqta óndirýshi kompanııa qyzmet kórsetýi tıis.