«Arlan» brondy mashınasy jaýyngerlik turǵyda synaldy
«Shyǵys» polıgonynda qazaqstandyq brondy kóliktiń áskerı múmkindikteri qysqy aýa raıy jaǵdaıynda tekserildi. Test-draıv aıasynda qarly burylystarda áskerı qyzmetshiler brondy mashınamen marsh jasap, «Arlanmen» jabdyqtalǵan «SARP» áskerı modýlin is-qımyl barysynda synap kórdi. Sondaı-aq Kalashnıkov avtomatynan, Dragýnov myltyǵynan jáne OSV-96 iri kalıbrli myltyqtan atyp brondy kóliktiń beriktigin tekserdi. Nátıjesinde otandyq ónim jeke quramnyń qaýipsizdigin qamtamasyz etetin joǵary ótimdi, manevrli jáne qorǵanysy myqty ekenin kórsetti.
«Arlan» - bul mınaǵa qarsy qorǵanysy kúsheıtilgen kóp maqsatty brondy dóńgelekti mashına. Bul túrdegi mashınalar synyqtar qarsy tura alatyn jáne jarylǵysh zattyń qýatyn seıiltý múmkindigi bar úlken sańylaýǵa ıe. Salmaǵy 16 tonnalyq brondy kólik jyldamdyǵyn saǵatyna 100 shaqyrymnan asyra alady jáne -50⁰S-tan +50⁰S-qa deıingi aýa raınyda paıdalaný úshin tolyq beıimdelgen.
«Arlannyń» jan-jaqty elektrondy-optıkalyq júıesiniń áskerı modýli jylý beretin kamerasymen, kúndizgi kórý kamerasymen, lazerlik alysty ólsheýshi quralmen kez-kelgen klımattyq jaǵdaıda túngi jáne kúndizgi ýaqytta baqylaýǵa, barlaýǵa jáne kózdep atýǵa múmkindik beredi.
Qazaqstan Qarýly kúshteriniń talaptary men usynystaryn eskere otyryp «Arlan» brondy mashınasy «Qazaqstan Paramaýnt Injınırıng» JShS qurastyrýshy bıýrosynyń qazaqstandyq mamandarynyń kómegimen jasalǵan.
2016 jyly brondy kólikterdiń birinshi legi elimizdiń Qarýly kúshterine berildi, osyǵan uqsas tehnıka búginde armııada joq. Atalǵan mashınanyń tıimdiligin synaý úshin jeke quram oqytyldy.