Arqan tartystyń Olımpıada oıyndarynyń baǵdarlamasyna engenin bilesiz be

<p>ASTANA. KAZINFORM &ndash; Bul kúnderi qazaqtyń ulttyq sport túrleriniń biri - arqan tartys oıyny 1900 &ndash; 1920 jyldar aralyǵynda Olımpıada oıyndarynyń baǵdarlamasyna enip, jarystar ótkenin birimiz bilsek, birimiz bile bermeımiz.</p>

Osyǵan baılanysty búgin Arqan tartys federatsııasynyń resmı baraqshasy arqan tartys adamzat balasymen birge jasasyp kele jatqany týraly shaǵyn málimetpen bólisti.

«Ǵalymdardyń tujyrymyna súıensek ejelgi adamdardyń qonysynan arqan tartystyń belgileri tabylǵan. Biraq, bul naqty fakt emes. Dáleldengen ýaqyt pen jer joq. Joramal ǵana. Al, naqty aqparattar b.z.d 1000 jyldary bastalady. Skandınavııa men Germanııa jerinde arqan tartys kúsh saıystarynyń biri bolǵan. Al, b.z.d 500 jyldary Grekııadaǵy Olımpıada oıyndarynda arnaıy komandalar arqan tartysyp, kúsh synasqan», - delingen habarlamada.

Sondaı-aq, 1900 – 1920 jyldar arasynda arqan tartys Olımpıada oıyndarynyń baǵdarlamasyna enip, jeńil atletıkanyń bir bólshegi retinde jarystar ótkeni aıtylady. Al 1912 jyldan bastap jeke sport túrinde jarystar uıymdastyrylǵany belgili boldy.

«Arqan tartystan tuńǵysh Olımpıada chempıony Shvetsııa men Danııanyń aralas quramasy. 1904 jyly AQSh-tyń Mılýokı klýby jeńse, 1908 jyly London polıtsııasynyń komandasy, 1912 jyly Stokgolm polıtsııasynyń komandasy chempıon bolady. Al, arqan tartystan sońǵy Olımpıada chempıondary Ulybrıtanııanyń ulttyq komandasy bolǵan», - dep jazdy Arqan tartys federatsııasy.

Keıin 1920 jyldardan keıin belgisiz sebeptermen arqan tartys Olımpıada oıyndarynyń baǵdarlamasynan alynyp tastalǵan.

Esterińizge sala keteıik, bıyl 8-14 qyrkúıek aralyǵynda Astana qalasynda V Dúnıejúzilik kóshpendiler oıyny ótedi. Arqan tartys osy álemdik dodanyń baǵdarlamasyna engen. Búgingi tańda elimizdiń ár oblysynda arqan tartystan kóshpendiler oıynyna irikteý syndary bastalyp ketti.