Arqalyqtaǵy JEO apatynyń sebebi aıtyldy

QOSTANAI. QazAqparat – Arqalyq ákimdigi birneshe kún buryn jylý elektr magıstralinde bolǵan apattyń boljamdy sebebin jarııalady, dep habarlaıdy QazAqparat tilshisi.

Ákimdiktiń málimetinshe, Arqalyq jylý elektr ortalyǵynyń jabdyqtary 95,2%-ǵa tozǵan. Jylytý maýsymy bastalǵaly kásiporyn úzilissiz jáne apatsyz josparly túrde jumys istep keledi.

«2021 jylǵy 29 jeltoqsanda «Arqalyq qalasyn jylýmen jabdyqtaý júıesin 2030 jylǵa deıin qaıta jańartý» atty paıdalanýǵa berý aktisine sáıkes, jańa qazandyq iske qosylǵan, onyń maqsaty mazýttan kómirge (qatty otynǵa) kóshý boldy. Atalǵan qazandyqta úsh bý jáne sý jylytý qazany bar. 2022 jylǵy 23 qarashada qatty otynmen jumys isteıtin qazandyqta №5 sý jylytý qazandyǵynda jarylys bolyp, saldarynan VK5 qaptamasy qulaǵan. Tekserý men aldyn ala qaraý nátıjesinde bul tarsyl VK5 salqyndatqyshtyń jarylýynan paıda bolǵany anyqtaldy. Qyzmetkerler esh zardap shekken joq», - dep túsindirdi ákimdik.

Jergilikti bıliktiń málimetinshe, bul oqıǵa ǵımaratqa, bý qazandyqtary men №4 sý jylytý qazandyǵynyń jumysyna, jalpy jabdyqqa áser etken joq.

«Jylý jelileriniń tozýy 90%-ǵa eskirgen. Jylytý maýsymy bastalǵan sátten 29 qarashaǵa deıin jylý jelilerinen apat baıqalǵan joq. Barlyq jumystar sapaly jáne qysqa merzimde oryndalyp keledi. Halyqtan aryz-shaǵym kelip túsedi, kezekshi brıgadalar ótinimderge jedel shyǵady. Apattar táýlik boıy joıylyp otyrady», - dep tolyqtyrdy qalalyq ákimdik.

Eske salsaq, Qostanaı oblysynyń Arqalyq qalasyndaǵy jylý elektr ortalyǵynda apat boldy.