Arqalyqta týberkýlezben aýyratyn jigit áskerge shaqyrtylǵan
Sońǵy jyldary elimizde áskerden jaltarǵandar sany artqan. Jekeleı alǵanda, Qostanaı oblysynda da bul kórsetkish edáýir joǵary. Máselen, bıyl 1033 jigit otan aldyndaǵy boryshyn óteýden bas tartyp otyr. Onyń 623-i - Qostanaı qalasynyń turǵyndary. Bul málimetti jergilikti polıtsııa qyzmeti bastyǵynyń orynbasary Andreı Grıgorevskıı jarııalady.
«Bıyl Qostanaı oblysy Qorǵanys isteri departamentiniń materıaldary boıynsha, áskerge barýdan bas tartqan 2 azamatqa qatysty qylmystyq is qozǵaldy. Olar tıisinshe Qostanaı qalasy men Áýlıekól aýdanynda turady. 2017 jyly atalǵan sebepke baılanysty 4 qylmystyq is qozǵalǵan bolatyn. Jyl basynan beri Qorǵanys isteri departamentiniń bólimderinen 572 suranym kelip tústi. Atalǵan suranymǵa sáıkes áskerge shaqyrylǵandar mekenjaılary boıynsha tekserildi. Nátıjesinde 417 jigit departamentke jetkizildi. Taǵy 90 azamat mekenjaılaryn qate kórsetken», - dedi Andreı Grıgorevskıı.
QR Memlekettik qyzmet isteri agenttigi oblystyq departamentiniń basshysy Salaýat Múksimovtiń sózinshe, qorǵanys salasynda sybaılas jemqorlyqtyń sebepterin anyqtaý jáne olardy joıý jumysyn kúsheıtý ózekti. Onyń aıtýynsha, tekseris kezinde áskerge shaqyrylýshy nemese onyń otbasy músheleri jergilikti polıtsııa qyzmetiniń ókilderimen ózara kelisimge kelýi yqtımal.
«Bul jerde ekiushty másele shyǵyp otyr. Sondyqtan sybaılas jemqorlyqqa qarsy arnaıy analızderdi iske qosyp, zertteıtin bolamyz», - deıdi departament basshysy.
Áskerden jaltarǵandar bir bólek, densaýlyǵy jaramaı tursa da, qulshynysy joǵary jastar bar. Máselen, 1997 jyly týǵan Arqalyq qalasynyń turǵyny A.-nyń týberkýlezben aýyratyny rastalsa da, medıtsınalyq komıssııa ony áskerge jaramdylar qataryna engizip jibergen. Salaýat Múksimov mundaı is-áreketter jemqorlyqtyń alǵysharttaryna jatady dep otyr.
Oblystyq densaýlyq saqtaý basqarmasy basshysynyń orynbasary Abat Jaýkov sóz aldy. Onyń derekterine súıensek, oblystyq medıtsınalyq komıssııanyń quramynda turaqty 14 maman bar. Onyń 5-eýi - joǵarǵy dárejedegi dárigerler.
«Medıtsınalyq tekserýler men statsıonarlyq kómekter óz ýaqytynda jergilikti eldi mekenderde júrgizildi. 2018 jyldyń kóktemgi shaqyrylymda 901 áskerge shaqyrylýshy tekserýden ótti. Sonyń ishinde bir azamattyń narkotıkalyq zattarǵa áýestigi anyqtaldy. Ol der kezinde narkologııalyq dıspanserdiń tizimine alyndy», - dedi Abat Jaýkov.
Qostanaı oblysy Qorǵanys isteri departamentiniń basshysy Sergeı Kýznetsov aıtqandaı, 2015 jyldyń kóktem aıynan bastap, Qylmystyq kodekstiń 387-babyna sáıkes, áskerden jaltarǵandarǵa 1000 aılyq eseptik kórsetkishpen aıyppul jáne 1 jyl bas bostandyǵynan aıyrý jazasy qoldanylady.