Arqalyqta polıtseı 5-qabattan qulaǵan boıjetkendi qaǵyp almaq bolǵan

ASTANA. QazAqparat - Arqalyqta polıtseı 5-qabattyń balkonynan qulaǵan qyzdy qutqaryp qaldy, dep habarlaıdy Polisia.kz saıtyna silteme jasap.

Búgin tańǵy saǵat 05:30-da qalanyń Jedel basqarý ortalyǵyna ótip bara jatqan adamdardan qyzdyń balkonnan taıyp, biraq temirdi ustap úlgergeni týraly habar kelip tústi.

Oqıǵa ornyna patrýldik polıtsııa qyzmetkerleri Almat Ámirhan men Rýslan Kapsamatov jetti.

Jaǵdaıdy baǵamdap, Almat Ámirhan dalada qalyp, al seriktesi besinshi qabatqa kóterildi.

Osy kezde ilinip turǵan qyz besinshi qabattan qulap ketti. Tómende turǵan polıtsııa qyzmetkeri ony qaǵyp alýǵa umtylyp, óz denesimen soqqyny jumsartyp qalǵan. Osynyń arqasynda 29 jastaǵy qala turǵyny zardap shekken joq.

Patrýldik polıtsııa qyzmetkeri Almat Ámirhan túrli dene jaraqatyn aldy, ásirese aıaǵyna zaqym kelgen. Oǵan medıtsınalyq kómek kórsetildi.