Arqalyq týmasy ózin balalar úıine tastap ketken anasyn izdeıdi
1992 jyly Arqalyqtaǵy Qarlyǵa men Nurlan Sadyqovtar birden 10 balany asyrap alǵan. Óse kele, 10 balanyń toǵyzy týǵan analaryn tapsa, eń kenjesi Ermek 15 jyldan beri izdeý salyp keledi. Іzdeý esh nátıje bermegen soń Jibek Joly telearnasyna kómekke júgindi.
«Ermek 1990 jyly Arqalyq qalasynyń perzenthanasynda dúnıege kelgen. Meniń ápkem men jezdem eki uldan keıin qyzdy armandap, balalar úıinen eki qyz alýdy uıǵarady. Sonda balalar úıinde 6 qyz, 4 ul jatyr eken. Olardyń keıbiri jasqa tolǵan, 5-6 aılyq balalar da bar. Meńgerýshi barlyq balany alyp ketýdi usyndy. Osylaısha, ápke-jezdem 12 balany ósirip, bilim berip, ómirden óz oryndaryn tabýǵa kómektesti», - dedi baǵdarlamaǵa kelgen Qanat Estek.
Balalar bir balabaqsha men bir mektepte ósken jáne 18 jasqa kelgende óz analaryn taýyp, kezdesýge nıet bildirgen.
«Anammen kezdessem, kóp nárse bilgim keledi, 90 jyldary qıyn zaman bolǵanyn da túsinemin, jaǵdaıy bolmaǵan shyǵar. Anama tek rahmet aıtqym keledi, aman-esen dúnıege ákelgeni úshin, ómir syılaǵany úshin alǵys aıtqym keledi. Esh renishim joq, kerisinshe kómek kórsetkim keledi. Qandaı jaǵdaıda ekenin bilgim keledi», - dedi Ermek Sadyqov.
Jýrnalıstik izdestirý barysynda arhıv qujattarynan Bekbolatova Aıgúl jáne Bekbolatov Murat esimderi tabyldy. Bul baǵdarlamada tabylǵan attas adamdardyń DNK synamasynan bıologııalyq týystyq tabylmady.
«El» tok-shoýynyń tolyq nusqasyn telearnanyń resmı paraqshasynan kórýge bolady.