Arqalyq qalasyndaǵy Torǵaı boksıt ken basqarmasy resmı túrde jabyldy

QOSTANAI.QazAqparat – Arqalyq qalasyndaǵy Torǵaı boksıt ken basqarmasy (TBKB) resmı túrde jabyldy. Qazirgi ýaqytta qyzmetkerler basqa jumystarǵa ornalastyrylyp jatyr, dep habarlaıdy QazAqparat Arqalyq qalasynyń ákimi Qaırat Ábishevke silteme jasap.

Qala ákiminiń aıtýynsha, jumyssyz qalǵan turǵyndarǵa barynsha qoldaý kórsetiledi. Jergilikti kásipkerler de memlekettik baǵdarlamalar sheńberinde jańa jumys oryndaryn ashpaq. Búginde TBKB-da jumys taýyp úlgermegen 269 adam bar. Olardyń ekeýi ýaqytsha jumys istep jatsa, 79 adam usynylǵan jumystan bas tartqan. ERG-diń basqa kásiporyndaryna buǵan deıin 189 adam qyzmetke alynǵan.

«2021 jyldyń qańtar aıynda ken basqarmasy qyzmetiniń tolyq toqtaýyna baılanysty ERG toby ókilderiniń, Qostanaı oblysy ákiminiń orynbasarynyń, Arqalyq qalasy kásipkerleriniń qatysýymen keńes ótti.

Onda «Eýrazııalyq Top» JShS alańynda bosatylatyn obektilerdi TBKB-na berý máseleleri qaraldy. Atalmysh nysandar qaıtarymsyz negizde beriledi dep josparlanýda. TBKB qyzmetkerlerin jumysqa ornalastyrý sharty da jasalady», - dedi Qaırat Ábishev.

Qazirdiń ózinde jergilikti «Allıýmınstroı» seriktestiginiń janar-jaǵarmaı nysandary, tehnologııalyq kólik tsehy, jóndeý-energetıkalyq jabdyqtary men qoıma sharýashylyǵy ýchaskelerine 80 jumysshy alynady.

Qala ákimi aıtqandaı, «Eńbek» baǵdarlamasy aıasynda Arqalyqta tórt jobaǵa 53 mln teńge shaǵyn nesıe berildi. «Bastaý-bıznes» boıynsha 17 Arqalyq turǵynyna kásipterin damytý úshin jalpy somasy 47 mln teńge qarajat berildi, eki kópbalaly ana 1 mln teńgege grant qarajatyna qol jetkizdi. Olar ońaltý ortalyǵy men balalar mektebin ashqan.