Arqalyq qalasynda memlekettik qyzmetshilerdiń synaq zaly ashyldy

QOSTANAI. QazAqparat – Búgin Arqalyq qalasynda memlekettik qyzmetshilerdiń aımaqtyq testileý zaly ashyldy, dep habarlaıdy QazAqparat oblystyq memlekettik qyzmet isteri departamentiniń baspasóz qyzmetine silteme jasap.

Synaq zalynyń ashylýyna oblystyń memlekettik qyzmet isteri departamentiniń basshysy Salaýat Múksimov pen Arqalyq qalasynyń ákimi Eldar Kúzenbaev qatysty. Mundaı oryndy ashýdaǵy basty maqsat – memlekettik jáne quqyq qorǵaý qyzmetine jumysqa turýshylarǵa jeńildik jasaý.

«Testileý zaly úzdik materıaldyq-tehnıkalyq bazamen jabdyqtalǵan. Bul Qostanaı oblysyndaǵy ekinshi zal, birinshisi oblys ortalyǵynda ornalasqan. Departament óńirlerdiń oblys ortalyǵynan alshaqtyǵyn, sondaı-aq memlekettik qyzmetshiler men óńirlerdegi bos oryndar sanyn zerdelep, atalmysh ortalyqty ashyp otyr. Zaldyń basty mindeti – memlekettik qyzmettiń qoljetimdiligin arttyrý, kandıdattar úshin qolaıly jaǵdaı jasaý jáne kólik shyǵyndaryn azaıtý», - dedi departament basshysy Salaýat Múksimov zaldyń ashylý saltanatynda.

Endi bul synaq zalyna Amangeldi, Jangeldın, Naýyrzym aýdandarynyń turǵyndary da júgine alady. Sonymen qatar, Aqmola oblysynyń kórshi Jaqsy, Esil, Jarqaıyń aýdandarynyń, sondaı-aq Qaraǵandy oblysynyń Ulytaý aýdany turǵyndarynyń da aımaqtyq synaq zalyna kelýge múmkindigi bar.