Arqalyq qalasyn jylytý úshin 1 mlrd teńge bólindi

QOSTANAI. QazAqparat – Búgin oblystyq máslıhattyń kezekten tys sessııasy ótti. Depýtattar Arqalyq qalasyna bólinetin bir mıllıard teńgeden astam qarjyny maquldady, dep habarlaıdy QazAqparat.

Jıynǵa halyq qalaýlylarynan bólek, oblys ákiminiń orynbasary Erlan Spanov jáne qoǵamdyq keńes músheleri qatysty. Olar óńir bıýdjetinen únemdelgen qarjydan túrli qajettilikter úshin 1,2 mlrd teńgeden astam aqsha bóldi. Oblystyq ekonomıka jáne bıýdjettik josparlaý basqarmasynyń basshysy Gúlbaram Musaǵazınanyń sózinshe, 35 mln teńge Qostanaı aýdany Nadejdın orta mektebiniń kúrdeli jóndeýine jumsalady.

«Densaýlyq saqtaý basqarmasyna 46,8 mln teńge bólindi. Bul qarjyǵa oblystyq aýrýhanaǵa angıograf ornatylady. Bul baǵdarlama jedel járdem stantsııasyn jetildirý, shaqyrýlardy qabyldaý jáne óńdeý, kólik monıtorıngi jáne dıalogty jazý úshin qajet. Kásipkerlik jáne ındýstrıaldy-ınnovatsııalyq damý basqarmasyna «Eńbek» baǵdarlamasy aıasynda qalalardaǵy kásipkerlik bastamalardy qoldaýǵa 131,8 mln teńge baǵyttalady. Energetıka jáne TKSh basqarmasyna jańa jylytý maýsymyn ýaqytynda jáne apatsyz ótkizý maqsatynda, Arqalyq jylý-energetıkalyq kompanııasyna mazýt satyp alýǵa 1 mlrd teńge bólindi», - deıdi Gúlbaram Musaǵazına.

Oblystyq qoǵamdyq keńestiń múshesi Sergeı Jalybın Arqalyq qalasyna baılanysty másele kóterdi. Onyń aıtýynsha, mazýt alýǵa jumsalatyn qarjyny azaıtý kerek.

«Nege jyl saıyn Arqalyqqa mazýt satyp alý úshin osynsha qarjy jumsalady? Mazýttan bas tartyp, otynnyń basqa túrine aýysý týraly másele qaralyp edi. Oblys bıýdjetiniń aýqymdy bóligi Arqalyqqa ketedi. Osylaı jalǵasa bere me?» - dep surady Sergeı Jalybın.

Qoǵamdyq keńes múshesine oblys ákiminiń orynbasary Erlan Spanov jaýap berdi. Aıtýynsha, Arqalyq aldaǵy jyldary kómirge kóshedi.

«Jyl saıyn jylý berý maýsymyn ótkizý úshin Arqalyq qalasyna mazýt satyp alýǵa 2,4 mlrd teńge qajet. Qazirdiń ózinde 900 mln teńge berildi, endi taǵy 1,5 mlrd teńgedeı jumsalady. Kómir qazandyǵy qurylysynyń jobasy ázirlendi. 2020-2021 jyl ishinde biz Arqalyq qalasyn kómirmen jylytýdyń jańa júıesin engizemiz. Kómirge kóshý oblystyq bıýdjetke júktemeni edáýir azaıtady», - deıdi oblys ákiminiń orynbasary.

Depýtattar qarajatty bólýge biraýyzdan daýys berdi.