Arqalyq qalasyn damytý jospary ázirlendi
10:33, 06 Aqpan 2023
ASTANA. QazAqparat – Arqalyq qalasyn áleýmettik-ekonomıkalyq damytý maqsatynda keshendi jospar jobasy ázirlendi. Bul týraly Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.
«Burynǵy Torǵaı oblysynyń quramyna kirgen Arqalyq qalasyn, Amangeldi jáne Jangeldi aýdandaryn áleýmettik-ekonomıkalyq damytý maqsatynda tıisti keshendi jospar jobasy ázirlendi. Kórsetilgen joba jalpy somasy 504,6 mlrd teńgeni quraıtyn 138 is-sharadan turady jáne qazirgi ýaqytta múddeli memlekettik organdarmen kelisilýde. Kelisilgennen keıin ol Respýblıkalyq bıýdjet komıssııasynyń otyrysyna shyǵarylatyn bolady», - dep atap ótedi Úkimet basshysy.
Premer-Mınıstr óńirdiń joldaryn, ınjenerlik-kommýnıkatsııalyq ınfraqulymyn, uıaly baılanysy men ınternetin damytýǵa, gazıfıkatsııalaýǵa, óndiris áleýetin arttyrýǵa, Arqalyq qalasynyń polıtehnıkalyq kolledjin materıaldyqtehnıkalyq qamtamasyz etýge, densaýlyq saqtaý júıesin jáne agroónerkásip keshenin damytýǵa jáne qabyldanatyn is-sharalarǵa qatysty neǵurlym tolyq aqparat depýtattarǵa qosymsha joldanatyndyǵyn atap ótedi.
«Jalpy joǵaryda kórsetilgen máseleler Úkimettiń udaıy baqylaýynda jáne olardy sheshý boıynsha jumys odan ári jalǵasatyn bolady», - dedi ol.
Ashyq kózderden alynǵan foto