Arkadıı Dvorkovıch shahmattan álem chempıonaty jaıynda: 20 jyldaǵy eń úzdik jaǵdaı jasalǵan

ASTANA. QazAqparat – Halyqaralyq shahmat federatsııasynyń prezıdenti Arkadıı Dvorkovıch elordada ótip jatqan shahmattan álem chempıonatynyń uıymdastyrylýyna joǵary baǵa berdi, dep habarlaıdy QazAqparat tilshisi.

«Bul - óte erekshe chempıonat. Birinshiden, ol álemniń 17-chempıonyn anyqtaıdy. Bul - klassıkalyq resmı shahmattyń ǵasyrdan asatyn tarıhyndaǵy ataýly oqıǵa. Sonymen qatar munyń aldyndaǵy chempıon ataǵyn qorǵaýdan bas tartty. Múmkin, keleshekte ol qaıtadan kúreser», - dedi FIDE prezıdenti elordadaǵy Shahmatshylar saıabaǵyna aǵash otyrǵyzý rásimi barysynda.

Sonymen qatar ol el basshylyǵyna jáne Qazaqstan shahmat federatsııasynyń prezıdentine qonaqjaılyǵy úshin shynaıy rızashylyǵyn bildirdi.

«Qazaqstandaǵy seriktesterimizge osynaý matchty uıymdastyrýǵa tolyqqandy qoldaý kórsetkeni úshin alǵysymyzdy bildiremiz. Qytaıdan da, Reseıden de kelgen delegatsııalar sońǵy 20 jyldaǵy eń úzdik jaǵdaı jasalǵan chempıonat bolǵanyn aıtyp jatyr», - dedi Arkadıı Dvorkovıch.