Arızona ınvestorlary Qazaqstanda mys óndirisin damytpaq

NUR-SULTAN. QazAqparat - Arızona shtatynyń taý-ken kompanııalary Qaraǵandy oblysynyń mys óndirisine ınvestıtsıa salýǵa nıetti. Bul týraly QR Strategııalyq bastamalar ortalyǵynyń jobalar jónindegi dırektory Baqytjan Sárkeev aıtty , dep habarlaıdy QazAqparat tilshisi.

Ortalyq ókili Arızona shtaty men Qazaqstan arasyndaǵy saýda-ekonomıkalyq baılanys áýeli taý-ken óndirisi men aeroǵarysh salasynan bastaý alatynyn aıtady. Bul baılanys jekelegen kásiporyndar aıasynan shyǵyp, memlekettik sektor deńgeıinde damymaq.

«Aeroǵarysh salasynda ushqyshsyz apparttar óndirisi boıynsha birlesken jobalar bar. Bul jerde arızonalyqtar bizge tehnologııalyq ónimderin satady degen sóz emes. Ózderinde jemisti jumys istep turǵan joǵary tehnologııalyq kásiporyndardyń bólimsheleri Qazaqstanda ashylýy múmkin. Bul medıtsına jáne qorǵanys salasyna qatysty. Ázirge naqty qandaı joba qolǵa alynatyny, oǵan qansha ınvestıtsııa tartylatyny belgisiz. Bul jolǵy delegatsııa memlekettik organ ókilderi deýge bolady. Osydan keıin bizge bıznes sektory keledi. Naqty kelisimder sol kezde jasalady», - deıdi Baqytjan Sárkeev.

Degenmen, baspasóz máslıhaty barysynda ekijaqty kelissóz nátıjesinde keminde 2 mlrd teńgeniń ınvestıtsııasy Qazaqstanǵa tartylatyny da aıtyldy.

«Arızona kásiporyndary mys óndirisi boıynsha seriktestik ornatýǵa qulyqty. Atalǵan 2 mlrd teńge ınvestıtsııanyń negizgi bóligi osy baǵytqa jumsalmaq. Qaraǵandy jáne Jezqazǵan óńirlerindegi mys qoryn birlesip ıgerý boıynsha kelissóz júrgizý kózdelgen», - deıdi strategııalyq bastamalar ortalyǵynyń ókili.

Aıta ketsek, Qazaqstanǵa AQSh-tyń Arızona shtatynan ókilder palatasynyń birneshe múshesi keldi. Olar 5-13 maýsym aralyǵynda Nur-Sultan, Shymkent, Almaty, Túrkistan jáne Óskemen qalalaryna barýdy josparlap otyr. Sapar nátıjesinde Arızona ókilder palatasy Nur-Sultan qalasynda turaqty keńsesin ashady.

Foto: metalspace.ru