Arystanbek Muhamedıuly qandaı qylmys jasady dep aıyptalyp otyr

<p>Astanada burynǵy Mádenıet jáne sport mınıstri Arystanbek Muhamedıulyna qatysty jańa is aıasynda basty sot otyrysy ótip jatyr, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Sotta eki epızod — «Dıplomat» qonaqúıin tartyp alý jáne «Altyn adam sherýi» kórmesin ótkizý kezindegi bıligin asyra paıdalaný, reıderlik áreket qaralyp jatyr.

Prokýror Oljas Haırýllaevtyń aıtýynsha, Arystanbek Muhamedıulyna Qylmystyq kodekstiń 28-baby 3-bóligi (qylmysty uıymdastyrý) jáne 189-babynyń 4-bóliginiń 2-tarmaǵy (zańsyz ıelený nemese talan-tarajǵa salý, ıaǵnı senip tapsyrylǵan bótenniń múlkin asa iri kólemde jymqyrý) boıynsha aıyp taǵylǵan. 

Eks-mınıstr sondaı-aq QK 361-baby 4-bóliginiń 3-tarmaǵy (jaýapty memlekettik laýazymda otyrǵan tulǵanyń aýyr saldarǵa alyp kelgen qyzmettik ókilettigin asyra paıdalanýy), 24-bap 3-bólim (qylmysqa oqtalý), 249-bap 1-bóligi (reıderlik), 250-babynda (ókilettigin asyra paıdalaný) kózdelgen qylmysty jasady degen kúdikke ilingen. 

Arystanbek Muhamedıulymen birge Almas Nurazhan, Abaı Satybaldın, Leonıd Kochetov, Azamat Kóshenov, Aıym Sádýaqasova, Gúlzat Jýaspaeva da sotta jaýap berip jatyr. 

Buǵan deıin habarlanǵandaı, 2019 jyly Diplomat qonaq úıiniń ıesi K. esimdi kásipker Arystanbek Muhamedıulyna júginip, materıaldyq kómek suraǵan.

Muhamedıuly oǵan 2,5 mlrd teńge berýge kelisip, onyń ornyna jaýapkershiligi shekteýli seriktestiktiń 71 paıyz kapıtalyn qaıyn enesiniń atyna rásimdeýdi suraǵan.

Tergeý tarapy eks-mınıstr sol kezde qonaqúıdi óz bıligine alýdy josparlaǵan degen paıym jasap otyr. 

Mámile jasalǵannan keıin biraz ýaqyt ótip, A.Muhamedıuly K. esimdi kásipkerden kapıtaldyń qalǵan 29 paıyzyn berýin talap etken. Tıisinshe ol bas tartqan.

Sodan keıin aıyptalýshy «Dıplomat» qyzmetkerlerine ózin osy keshen ıesi retinde kórsetip, olarǵa JShS dırektoryn qonaqúıge kirgizbeýdi tapsyrǵan.

Artynsha A.Muhamedıuly seriktestik qatysýshylarynyń jınalysyn uıymdastyryp, hattamany qoldan jasap, JShS basshysy atanady.

Arystanbek Muhamedıuly taǵylǵan aıyppen kelispedi.

Eske salaıyq, Ulttyq mýzeıdiń burynǵy dırektory Arystanbek Muhamedıuly byltyr 28 mamyrda qamaýǵa alynǵan edi.

Bıylǵy 20 maýsymda sot úkimimen A.Muhamedıuly 8 jylǵa bas bostandyǵynan aıyryldy.

Sonymen qatar onyń sybaılastary da sottaldy.