Arystaǵy jarylystan zardap shekken áskerı jumyssyz, baspanasyz qalǵan
Altaı Asqarbekov «Jaýyngerlik erligi úshin» medaliniń ıegeri. Bul nagrada oǵan Arystaǵy eńbegi úshin berilgen. Serjant 2019 jyly áskerı qoımadaǵy jarylystan keıin oq-dárilerdi zalalsyzdandyrý, tasymaldaý, joıý jumystaryn júrgizgen. Ol 41-shi kúni jaýyngerlik tapsyrmany oryndaý barysynda jaryqshaq tıip aýyr jaralanǵanyn aıtady. Sodan beri 5 ret kúrdeli ota jasatqan azamat tıisti em de qabyldaı almaı júr eken.
— Áýel bastan-aq Qarýly Kúshter meniń jaǵdaıyma tıisti kóńil bólgen joq. 2024 jyldyń sáýir aıynda meni ásker qatarynan shyǵaryp, kelisimshartty uzartýdan bas tartty. Áleýmettik qamsyzdandyrýsyz qaldyryp, qyzmettik ótilimniń jetispeýshiligin jeleý ete otyryp, bizdi baspanasyz jáne zeınetaqysyz qaldyrdy. Jumystan bosatylǵannan keıin Qorǵanys mınıstriniń orynbasary, general-maıor Shaıh-Hasan Jazyqbaevtyń qabyldaýynda jaralanǵan sátten bastap alýǵa tıis tólemim bar ekeni bildim. Búgingi kúnge deıin tólem máselesi ashyq kúıinde qalyp otyr. Úkimet Apparatynyń ótinishterdi qaraýdy baqylaý jónindegi bólim meńgerýshisiniń orynbasary Bolat Baıkenov te qabyldady. Ol bizdi turǵyn úımen, laıyqty eńbekaqysy bar jeńil jumyspen qamtamasyz etýge jáne bank aldyndaǵy bereshekti esepten shyǵarýǵa járdemdesýge ýáde bergen edi. Ol máseleler de sheshilmeı qaldy, — dedi Altaı Asqarbekov.
Áleýmettik jelidegi áskerıdiń shaǵymyna Jetisý garnızony baspasóz qyzmeti jaýap berdi.
— Jaraqat alǵannan keıin, 2019 jyly zapastaǵy serjant A. Asqarbekovke bir jarym aılyq aqshalaı qamtamasyz etý mólsherinde birjolǵy ótemaqy tólendi. Qarýly Kúshter qatarynan bosatylǵan kezde qoldanystaǵy zańnamaǵa sáıkes barlyq tıisti tólemder tólendi. Atap aıtqanda: jumystan bosatylǵan kezdegi shyǵý járdemaqysy — 485 730 teńge; birjolǵy turǵyn úı tólemderi — 6 485 724 teńge. Sonymen qatar, otbasyna Úshtóbe qalasynan 4 belmeli páter usynyldy, biraq ol bul usynystan bas tartty. Osyǵan oraı, ol turǵyn úı máselesin sheshý úshin jergilikti atqarýshy organdarǵa júginýge quqyly — delingen resmı málimette.
Al Altaı Asqarbekovtiń jubaıy bul tólemder jumystan shettetilgen árbir áskerı qyzmetshige zań boıynsha berilýi tıis tólemder deıdi.
— Ol zań boıynsha berilýi tıis dúnıe. Úshtóbeden bergen baspana eski boldy. Áıtpese bas tartpas edik. Alty balamen kúnkórisimiz qıyndap ketti. Joldasym kúzetshi bolyp júr. Aılyǵy 145 myńdaı. Em qabyldamaǵanyna 6 aı boldy. Emge barsa, jumyssyz qalady. Bir balamyz ýaqytyly dárisin almaǵan soń demikpe bolyp qaldy, — deıdi jubaıy Ámına Asqarbekova.
Altaı Asqarbekovtiń omyrtqasy men basynda áli de kinárat bar. Oń qolynda usaq jaryqshaqtar kóp. Keshendi em qabyldaýǵa kúıbeń tirshilik mursha berer emes. «Kúmis alqanyń» ıegeri áıeliniń de densaýlyǵy máz emes. Sharasy taýsylǵan azamat joǵarydan ádiletti sheshim bolaryna senedi.
Eske salaıyq, osyǵan deıin Jarkentte qaıtys bolǵan kapıtan Darhan Nurlanulynyń ólimine qatysty 4 adamnyń qamaýǵa alynǵanyn jazǵanbyz.