Arystaǵy apat, Semeı ormany, tasqyn, ańdamaı sóılegen elshi: Prezıdentten kimder sógis aldy
Arys tragedııasy
2019 jyldyń jazynda Túrkistan oblysynyń Arys qalasynda ornalasqan qarý-jaraq qoımasynda dúrkin-dúrkin jarylys bolyp, búkil el bir dúrlikken. Resmı málimet boıynsha, jarylys saldarynan bir adam qaza taýyp, ondaǵan adam jaraqat aldy. Osyǵan baılanysty 12 maýsym aza tutý kúni dep jarııalandy.
Arystaǵy apatqa jol bergeni úshin birneshe laýazymdy tulǵa jazalandy. Prezıdent ókimimen burynǵy Qorǵanys mınıstri Sáken Jasuzaqov Qarýly kúshter júıesinen shyǵarylsa, qarý-jaraq pen oq-dárilerdi saqtaý obektilerin kóshirý jáne ornalastyrý baǵdarlamasyn iske asyrý kezindegi eleýli kemshilikterge jol bergen Qorǵanys mınıstiriniń birinshi orynbasary jáne Qarýly Kúshteri bas shtabynyń bastyǵy Murat Bektanovqa, buryn birinshi vıtse-mınıstr bolǵan Murat Maıkeevke, túrli jyldary Qorǵanys mınıstriniń orynbasary bolǵan Talǵat Janjúmenovke qatań sógis jarııalandy
Kóktóbeniń jasyl jelegi
Almaty qalasyna issaparmen kelgen Prezıdent qala ákiminiń birinshi orynbasary Erlan Qojaǵapanovqa Kók-Tóbedegi kesilgen aǵashtar úshin sógis jarııalady.
«Shveıtsarııada úsh jyl jumys istedim. Onda aǵashtardy zańsyz kesý, tipti bir aǵashty kesip tastaý aýyr qylmys bolyp sanalady. Sebebi, ol - búkil halyqtyń ortaq múligi.
Kók-Tóbedegi alma kóshetteri syn kótermeıdi. Osyǵan baılanysty ákimniń birinshi orynbasary Erlan Qojaǵapanovqa sógis jarııalaımyn. Igi isti joq qyldyńyzdar», - dedi Qasym-Jomart Toqaev.
Koronavırýs
Memleket basshysy koronavırýs indetiniń taralýyna qarsy sharalar qabyldaý jónindegi keńeste ózderine júktelgen mindetterdi shala oryndaǵan birqatar sheneýniktiń jumysyn synǵa aldy.
Osylaısha jumysyna salǵyrt qaraǵany úshin Shymkent qalasynyń ákimi bolǵan Murat Áı̆tenovke, Aqtóbe oblysynyń ákimi bolǵan Ońdasyn Orazalınge, Pavlodar oblysynyń ákimi bolǵan Ábilqaıyr Sqaqovqa jáne Vedomstvoaralyq komıssııanyń tóraǵasy, Premer-mınıstrdiń orynbasary bolǵan Eraly Toǵjanovqa sógis jarııalandy.
Al sol kezdegi elorda ákimi Altaı Kólginovke, Almaty qalasynyń ákimi Baqytjan Saǵyntaevqa, Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıevke eskertý jasaldy.
Qaıta kelgen sheneýnik
2021 jyldyń tamyz aıynda Memleket basshysy sol kezdegi Jambyl oblysynyń ákimine sógis jarııalady. Berdibek Saparbaev 2019 jyly Prezıdent tapsyrmasymen qyzmetten bosatylǵan sheneýnikti jaýapty qyzmetke taǵaıyndaǵan bolyp shyqty. Іle-shala Berdibek Saparbaev oblystyq Tabıǵı resýrstar jáne tabıǵat paıdalanýdy retteý basqarmasynyń basshysy Qaırat Dosaevty qyzmetinen bosatty. Bul adam 2019 jyldyń qarasha aıynda qala mektepteriniń birinde 12 jastaǵy qyzdy zorlaý oqıǵasyna baılanysty Taraz qalasynyń ákimi qyzmetinen bosatylǵan edi.
Ádep buzǵan elshi
Prezıdent Toqaev bul kezde Mysyrdaǵy elshi Qaırat Lama Sharıfke sógis jarııalady.
«Prezıdent Qasym-Jomart Toqaev Qazaqstannyń Egıpet Arab Respýblıkasyndaǵy Tótenshe jáne Ókiletti Elshisi Qaırat Qaıyrbekuly Lama Sharıfke QR Memlekettik qyzmetshileriniń Ádep kodeksiniń 9-tarmaǵynyń talaptaryn saqtamaǵany úshin sógis jarııalady», - dep jazdy Bort №1» Telegram-arnasy (qazir ataýy Aqorda).
Lama Sharıf óziniń Facebook paraqshasyna Nur-Sultan qalasyna burynǵy Astana ataýyn qaıtarý týraly, Qazaqstandy Qazaqııa dep ózgertý týraly óz oıyn jazǵan edi.
Qant jáne kıik
Úkimettiń keńeıtilgen otyrysynda Memleket basshysy Saýda jáne ıntegratsııa mınıstri Baqyt Sultanov pen Aýyl sharýashylyǵy mınıstri Erbol Qarashókeevke qant tapshylyǵyn retteı almaǵany úshin, Ekologııa, geologııa jáne tabıǵı resýrstar mınıstri Serikqalı Brekeshevke kıik sanyn retteý jumystaryn dúrbeleńge aınaldyrǵany úshin sógis jarııalady.
Semeı ormany
Abaı oblysyndaǵy orman órti qaıta qurylǵan óńirdiń jańa ákimin qyzmetten alyp túse jazdaǵany el esinde. Alapat órt 15 adamnyń ómirin áketkeni resmı habarlanǵan edi.
Qasym-Jomart Toqaev Abaı oblysynyń ákimi Nurlan Uranhaevqa Semeı ormanyndaǵy órtke baılanysty óz mindetin tıisti deńgeıde atqarmaǵany úshin sógis jarııalady.
«Túsinemin, oblys endi quryldy, siz – jańa ákimsiz. Osy sebepti ǵana sizge sógis jarııalaımyn. Negizi, mundaı qatelik úshin birden qyzmetten bosatý kerek. 14 adamnan aıyrylyp qaldyq. Bul ne sizge, oıynshyq pa?» - dedi Prezıdent sógis jarııalaı otyryp.
Tasqyn
Bıylǵy tasqyndar eldiń birneshe óńirine jaıylyp, 100 myńnan astam qazaqstandyqtyń ómirine kesirin tıgizdi.
Prezıdent tabıǵı apatqa qarsy ýaqtyly shara qabyldamaǵany úshin Premer-Mınıstrdiń birinshi orynbasary Roman Sklıarǵa, Sý resýrstary jáne ırrıgatsııa mınıstri Nurjan Nurjigitovke qatań sógis jarııalady. Al Aqtóbe, Qostanaı, Batys Qazaqstan oblystarynyń ákimderine qatań sógis jáne qyzmettik mindetterine tolyq saı kelmeýine baılanysty eskertý berdi. Atyraý, Aqmola, Almaty, Pavlodar jáne Abaı oblystarynyń ákimderine qatań sógis jarııalandy.