Arysta 2030 jylǵa deıin 5 myńǵa jýyq jańa jumys orny qurylady
Aýyl sharýashylyǵy, logıstıka salalarynda da mańyzdy jobalar júzege asady. Bul jospardyń bári Arys qalasynyń 2030 jylǵa deıingi ekonomıkalyq damý strategııasyna engizildi. Atalǵan qujat oblys ákimdiginde ótken arnaıy májiliste tanystyryldy. Túrkistan oblysynyń ákimi Darhan Satybaldy Arys qalasynyń tranzıttik, logıstıkalyq jáne óndiristik áleýetin tolyq paıdalaný kerektigin aıtty.
«Damý strategııasyndaǵy árbir jospar men ındıkatorlar oryndalýy tıis. Turaqty qadaǵalanady. Investıtsııa kólemin ulǵaıtý mańyzdy. Kelissózder júrgizip, jumys oryndaryn kóbeıtetin jobalardy júzege asyryńyzdar. Arystyń múmkindigi joǵary. Jaqsy bastamalar bar. Nátıje kútemin», – dedi Darhan Satybaldy.
Arys qalasynyń ákimi Gúljan Qurmanbekovanyń aıtýynsha, 9 aıdyń qorytyndysymen jalpy óńirlik ónimniń kólemi 38,5 mlrd. teńgeni qurady.
Usynylyp otyrǵan damý josparyna sáıkes 2030 jylǵa deıin Arysta ónerkásip óndirisi 12,6 mlrd. teńgeden, 35,8 mlrd. teńge jetip, 3 esege deıin ósedi dep kútilip otyr. Óńdeý ónerkásibi 20,4 mlrd. teńgege jetip, 2,5 esege deıin ósse, qurylys jumystarynyń kólemi 9,5 mlrd. teńgege jetip, 1,5 esege deıin ósedi degen jospar bar. Saýda kólemin 30,2 mlrd. teńgege, ıaǵnı, 2 esege deıin ósirý kózdelgen. Al aýyl sharýashylyǵy kólemin 74,8 mlrd. teńgege jetkizip, 2,5 esege deıin ósirý mejelengen. Nátıjesinde jalpy óńirlik ónim 72,2 mlrd. teńgeden 170,7 mlrd. teńgege jetip 2,4 esege deıin ósedi degen jospar bar.
2030 jylǵa deıin Arysta jalpy quny 386,1 mlrd. teńgege quraıtyn 166 ınvestıtsııalyq jobany iske asyryp, 5 myńǵa jýyq jańa jumys ornyn qurý josparlanýda. Atap aıtsaq, aýyl sharýashylyǵynda 59 joba júzege asyrylyp, 1843 jańa jumys orny qurylady. Sý únemdeý tehnologııalaryn endirýde 4 joba iske asyp, 105 jańa jumys orny qurylmaq. Ónerkásip salasynda – 49 joba, quny 135,6 mlrd. teńge (1607 jańa jumys orny), al bilim jáne densaýlyq salasynda 22 joba júzege asyp, 685 jańa jumys orny ashylady dep kútilip otyr.
Qalaǵa 107,4,0 mlrd. teńgege deıin ınvestıtsııa tartylyp, jyldyq ınvestıtsııa kólemi 4 esege deıin ósedi degen meje qoıylǵan. Aımaqta rezeńke jáne plastmassa buıymdaryn óndiretin kásiporyndar ashylady. Mashına jasaý, tamaq ónimderi, qurylys zattary men basqada ónimder, munaı-hımııa, kókónis jáne jemis-jıdek óńdeý boıynsha jobalar júzege asyrylady.