«Áriptesterdiń kelisiminsiz áskerı bazaǵa oryn joq» - respýblıkalyq basylymdarǵa sholý

ASTANA. 22 jeltoqsan. QazAqparat - Qazaq aqparat agenttigi respýblıkalyq basylymdarda 22 jeltoqsan, beısenbi kúni shyqqan ózekti materıaldarǵa sholýdy usynady.

***

Keshe Aqordada Qazaqstan Respýblıkasynyń Memlekettik hat­shy­sy Qanat Saýdabaevtyń tóraǵalyq etýimen Shetelde kadrlar daıar­laý jónindegi respýblıkalyq komıssııanyń qorytyndy májilisi ótti. Osyǵan oraı «Egemen Qazaqstan» gazetinde «Bolashaqtyń» jańa múmkindikteri» degen taqyryppen maqala basyldy. Basylymnyń atap ótýinshe, komıssııa otyrysynyń qorytyndysy boı­yn­sha 216 úmitkerge «Bolashaq» ha­lyqaralyq stıpendııasyn taǵaıyn­daý týraly sheshim qabyldandy. Komıssııa 2012 jylǵa arnalǵan basym mamandyqtar tizbesin bekitti. Tizbe boıynsha 74 mamandyq bar. Taǵy bir eskere ketetin jáıt, ma­mandardy daıarlaý tek magıstratýra men doktorantýra (PhD) baǵdarlamasy sheńberinde ǵana iske asyrylmaq. Bilim salasy ókiliniń aıtýy boıynsha, 2011 jylǵy «Bolashaq» baǵdar­la­ma­sy aıasynda atqarylǵan ju­mystar qorytyndylandy. Túlekterdi jumysqa ornalastyrý má­se­lesi sóz boldy. Sonymen qatar kelesi jyldan bastap «Bolashaq» stıpendııasyna ıe bolýǵa úmitkerden mindetti túrde jumys berýshi jaqtyń kepildik haty talap etilmek.

«Keshe Parlament Senatynyń Tóraǵasy Qaırat Mámı QHR Shyńjań-Uıǵyr avtonomııalyq aýdany Halyqtyq saıa­sı-konsýltatıvtik keńesiniń tóraǵasy Asqat Kerimbaı­dy qabyldady», - dep jazady «Egemen Qazaqstan» gazeti. Kezdesý barysynda Qazaqstan men Qy­taıdyń ekijaqty qatynastaryn odan ári damytý másele­leri talqylandy. Basylymnyń jazýynsha, joǵary deńgeıdegi ózara sa­parlardyń jıiligin atap óte kelip, Q.Mámı QHR Halyq ókil­de­riniń Búkilqytaılyq jınalysy Turaqty komıtetiniń (HÓBJ TK) Tóraǵasy Ý Bangonyń bıylǵy qyrkúıek aıyndaǵy Qazaqstanǵa jasaǵan alǵashqy resmı sapa­ry­nyń nátıjelerin joǵary baǵa­lady. «Bul sapar Qazaqstan men Qytaıdyń jan-jaqty strate­gııalyq áriptestigin nyǵaıtýǵa, parlamentaralyq deńgeıdegi baılanystardy damytýǵa jańa serpin berdi», - dedi Senat Tóraǵasy.

***

Senat basshysy mańǵystaýlyqtardy sabyrǵa shaqyrdy. «Men barsha jańaózendikterdi, Aqtaýdyń jáne Mańǵystaýdyń barlyq turǵyndaryn tártip pen sabyr saqtaýǵa shaqyramyn! Otanymyzdyń turaqty damýynyń kepili - eldiń birligi men qoǵamdaǵy turaqtylyq. Bul - eldiń árbir azamatynyń paryzy! Muny únemi este saqtaýymyz kerek», - dedi Qaırat Mámı. «Aıqyn» gazetiniń jazýynsha, Senat spıkeri bul málimdemesin keshe Joǵarǵy palatanyń jalpy otyrysynda jasaǵan. Maqala «Tynyshtyq qana tirek bola alady» degen taqyryppen berilgen. «Jańaózen qalasynda oryn alǵan oqıǵanyń negizinde sot arqyly, sondaı-aq jergilikti atqarýshy organdarmen jáne jumys berýshilermen rettelýge tıisti qatardaǵy eńbek daýy jatyr. Biraq osy áleýmettik máseleni basbuzarlyq jasaýdy kózdegen jeke top saıasılandyryp, qoǵamdyq tártipsizdikti buzý áreketine ákep soqty», - degen ol.

***

«Memleket basshysy Nursultan Nazarbaev jumys sapary aıasynda UQShU ujymdyq qaýipsizdik keńesiniń sessııasyna qatysty», - dep jazady «Alash aınasy» gazeti búgingi sanyndaǵy «Áriptesterdiń kelisiminsiz áskerı bazaǵa oryn joq» degen taqyryptaǵy maqalasynda. Basylymnyń atap ótýinshe, sessııa barysynda Qazaqstan, Reseı, Armenııa, Belarýs, Qyrǵyzstan, Tájikstan jáne Ózbekstan basshylary UQShU-ǵa múshe elderdiń qaýipsizdigi úshin uıymnyń qyzmetin odan ári jetildirý jáne eýrazııalyq keńistiktegi qaýipsizdikti qamtamasyz etýdiń negizgi tetikteriniń biri retinde onyń rólin ornyqtyrýǵa qatysty strategııalyq máni bar keshendi máselelerdi talqylaǵan. Sonymen qatar UQShU-ǵa barlyq jarǵylyq organdary boıynsha tóraǵalyq etý Belarýstan Qazaqstanǵa ótken.

***

«Kazahstanskaıa pravda» gazetiniń jazýynsha, Memleket basshysynyń atyna el, úkimet basshylarynan, halyqaralyq uıymdardyń ókil­derinen Qazaqstan Respýblıkasy Táýelsizdiginiń 20 jyldyǵyna baılanysty quttyqtaýlar tolassyz kelip túsýde. Máselen, Qyrǵyz Respýblıkasynyń Prezıdenti Almazbek Atambaev: «Qazaqstan ótken jyldar ishinde óz Prezıdentiniń dana basshylyǵymen ekonomıkalyq jáne qoǵamdyq-saıası jańarýlar, óziniń halyq­ara­lyq bedelin nyǵaıtý isinde aıtarlyqtaı tabystarǵa jetti», - dep atap ótse, Iran Islam Respýblıkasynyń Prezıdenti Mahmud Ahmadınejad quttyqtaý hatynda Qazaqstan óziniń damýy men gúldenýi jolynda aldaǵy ýaqytta da úlken tabystarǵa jetetinine senim bildirgen.