«ArHO-2021»: Qazaqstandyq áskerıler ushqyshsyz ushý apparaty jarysynda jeńiske jetti

NUR-SULTAN. QazAqparat - Armııa halyqaralyq oıyndary aıaqtalýǵa jaqyn. Elimizdiń áskerı qyzmetshileri ushqyshsyz ushý apparattary arasyndaǵy «Suńqar ańshylyǵy» jáne mınaatqysh eseptoptarynyń «Artıllerııadan oq atý sheberleri» jarystarynda bultaryssyz jeńiske jetti, dep habarlaıdy QazAqparat.

«Suńqar ańshylyǵy» konkýrsynda Belarýs, Iran, Qazaqstan jáne Reseı ushqyshsyz ushý apparattarynyń eseptoptary qatysty. Bul saıysta ekinshi oryndy Belarýs, úshinshi oryndy Reseı komandalary enshiledi.

«Artıllerııadan oq atý sheberleri» jarysyna Ázerbaıjan, Belarýs, Vetnam, Iran, Qazaqstan, Reseı, Sırııa, Tájikstan jáne Ózbekstan Qarýly Kúshteriniń ókilderi qatysty. Bul konkýrsta jeńiske jetken Qazaqstan komandasy. Ekinshi – Reseı, úshinshi – Ázerbaıjan.

Budan ózge, Qazaqstan Qarýly Kúshteriniń áskerı qyzmetshileri birqatar saıystardyń júldegerleri atandy. Olar «Desant vzvody» konkýrsynda ekinshi oryndy qytaılyq qarsylastarymen ózara bólisti. Sonymen qosa, «Taktıkalyq mergen», «Attar marafony», «Beıbitshilik jaýyngeri» jáne «Armııa mádenıeti» konkýrstarynda úshinshi oryndy enshilegenin aıta keteıik.

4 qyrkúıek Armııa halyqaralyq oıyndarynyń jabylý rásimi ótetin kúni «Tank bıatlony» jarysynyń aqtyq estafetasy ótedi. Oǵan Ázerbaıjan, Qazaqstan, Qytaı jáne Reseıdiń tank ekıpajdary qatysady.

«Elbrýs sheńberi», «Tártip saqshysy», «Teńiz kýbogy» konkýrstary áli de jalǵasýda.