Arhıv jáne kitaphana mamandaryna daıarlaýǵa arnalǵan grant 5 ese ulǵaıdy
Bıyl «Kitaphana isi, aqparatty óńdeý jáne arhıv isi» bilim berý baǵdarlamasy boıynsha bakalavrıat joǵary bilimi bar mamandardy daıarlaýǵa 2023-2024 oqý jylyna arnalǵan memlekettik bilim berý tapsyrysynyń kólemi ósti. Osyǵan deıin atalǵan mamandyqtarǵa 20 grant qana bólingen bolsa, bıylǵy maýsym aıynda engizilgen ózgeristerge sáıkes grant sany 100-ge deıin ulǵaıdy.
Bul Mádenıet jáne sport mınıstrliginiń Ǵylym jáne joǵary bilim mınıstrligimen birlesken jumysynyń nátıjesinde iske asty. Basty maqsat - memlekettik arhıvter men kitaphanalardyń kadrlyq áleýetin bilikti jas mamandarmen kúsheıtý.
Budan bólek, Memleket basshysynyń tapsyrmasymen halyq tyǵyz ornalasqan jáne jańadan qurylǵan oblystardyń jastaryna elimizdiń jetekshi joǵary oqý oryndaryna túsýi úshin arnaıy memlekettik bilim granttary qarastyrylyp otyr. Oǵan sáıkes, 5 óńirge kitaphana jáne arhıv mamandaryn daıarlaýǵa arnalǵan qosymsha 89 grant berildi. Onyń ishinde Túrkistan oblysyna – 52, Shymkent qalasyna – 14, Jetisý oblysyna – 12, Ulytaý oblysyna – 1 jáne Abaı oblysyna – 10.
Sonymen qatar, 2023-2024 oqý jylyna magıstrlerdi daıarlaýǵa - 20, PhD doktoryna 3 grant bólý josparlanyp otyr.
«Mádenıet jáne sport mınıstrligi arhıv jáne kitaphana salalaryn bilikti kadrlarmen qamtamasyz etý baǵytynda birqatar jobalardy júzege asyrady. Onyń ishinde kitaphanashylardy shetelde oqytý nemese taǵylymdamadan ótýge jiberý. Sondaı-aq turaqty túrde biliktilik arttyrý is-sharalaryn uıymdastyrý. Atalǵan mamandyqqa grant sanynyń ulǵaıýy jas mamandarmen salanyń kadrlyq áleýetin kúsheıtýge múmkindik beredi»,- dedi QR MSM Arhıv, qujattama jáne kitap isi komıtetiniń tóraǵasy Qýat Borash.