Arhıv 2025 jobasy tarıh jaıly derekterdi zertteýge múmkindik beredi - Aqberen Elgezek
Onyń aıtýynsha, búgingi maqala qazaq tarıhyn júıeleýdi jańa kezeńge shyǵaratyn qadam. Búgin barlyq zııaly qaýym ókilderi, tarıhshylar úshin qýanyshty kún.
«Qazaqstanda táýelsizdik alǵaly 27 jylda óziniń tól tarıhyn saralaýǵa ony júıeleýge qalpyna keltirýge úlken talpynystar bolǵan. Mysaly «Mádenı mura» baǵdarlamasynyń ózin alaıyq. Bul baǵdarlama aıasynda tarıhı jádigerlerdi qalpyna keltirý, tarıhı eskertkishterdi jóndeý sııaqty irgeli jumystar jasaldy. Odan keıin tarıh ǵylymyndaǵy teorııalyq keıbir máseleleri qalpyna keltirildi. Biraq týra osyndaı Elbasynyń maqalasy sııaqty arnaýly úlken baǵyt qamtylmaǵan bolatyn», - dedi aqyn.
Onyń aıtýynsha, Elbasy qazaq tarıhynda biz uıalatyn eshteńe joqtyǵyn taǵy da shegeledi.
«Bizdiń dalamyz tarıhy tereńde jatqan úlken memleketterdiń otany, úlken órkenıetterdiń altyn besigi bolǵan. Qazaq jeri úlken rýhanı, fılosofııanyń, ádebıettiń, óner men ilim-bilimniń, tipti dinderdiń bastaýy da bolǵan», - dedi Aqberen Elgezek.
Qalamger óz sózinde Prezıdent maqalasynan soń biz estimegen jańa tarıh paraǵy ashylýy múmkin ekendigin aıtty.
«Biz óz tarıhymyzdy búginge deıin áli tereń zertteı qoıǵan joqpyz. Osy kúnge deıin biz tarıhqa otarlaý kózqarasymen qarap keldik. Tarıhı zertteý mektepterimizdiń ózi sovettik, orys tarıhnamasy jolymen ketken. Áli kúnge deıin soǵan alańdap turady. Al Elbasynyń buǵan jazǵan maqalasy oı erkindigi, zertteý erkindigin beredi. Shynymen de táýelsiz qazaq óz tarıhymyzdy ózimiz ashyp turyp qaraıtyn múmkindik. Sebebi kez-kelgen memlekette tarıhı saıasat degen uǵym bolady. Memleket óz tarıhyna nazar aýdarmaıtyn bolsa árkim ártúrli jazady. Tarıh júıeleýdi qajet etedi. «Arhıv 2025» arnaıy jobasy jer jahanda shashylǵan qazaq tarıhy jaıly derekterdi jınap zertteýge múmkindik beretin dúnıe. Bul jobalar iske asatyn bolsa, biz tipti ózimiz estimegen, bilmegen jańa tarıh kýágeri bolýymyz múmkin. Sol sebepti biz ózimizdiń ejelgi tarıhymyzǵa, ejelgi dúnıe tarıhyna, erte orta ǵasyr tarıhyna, qazirgi zaman tarıhyna derekterdi jınaıtyn bolsaq qana óz tarıhymyzdy júıeleıtin bolamyz. Al bizdiń tarıh kez-kelgen ult tarıhynan esh jeri artyq bolmasa kem emes. Bul maqala tarıhı sanamyzǵa silkinis beretini ras. Tarıhı sanasy qalyptaspaǵan eldiń bolashaqtaǵy beınesi solǵyn kórinedi», - dedi ol.
Aıta ketý kerek, búgin QR Prezıdenti Nursultan Nazarbaev «Uly dalanyń jeti qyry» atty maqalasyn jarııalaǵan bolatyn.