Arhımed Muhambetov: Jergilikti sharýa qojalyqtaryn damytýymyz qajet

QOSTANAI. QazAqparat – Qostanaı oblysynda iri et óńdeý zaýyty iske qosylady. Aımaq basshysy Arhımed Muhambetov jańa salynyp jatqan nysanǵa baryp, qurylys barysymen tanysty, dep habarlaıdy QazAqparat oblys ákiminiń baspasóz qyzmetine silteme jasap.

Jańa zaýyt iske qosylsa, óńirde 180-nen astam turaqty jumys orny ashylmaq. Qarapaıym zattar ekonomıkasy» baǵdarlamasy aıasynda júzege asyrylyp jatqan jobany bıznesti damytý ınstıtýttary qoldady. Munda jylyna 20 myń tonnaǵa deıin et óńdeledi. Aýqymdy jobanyń quny – 5,1 mlrd teńge.

«Atalmysh joba oblysqa kelip jatqan et ımportyn azaıtýǵa múmkinlik beredi. Negizgi shıkizat kózi jergilikti sharýa qojalyqtarynan alynady. Sondyqtan atqarýshy bılik qostanaılyq sharýalardyń isin damytýdy kózdeıdi», - dedi Arhımed Muhambetov.

Et óńdeý zaýytynyń ákimshilik-turmystyq ǵımaraty, avtokólik jýatyn eki kesheni, sanıtarlyq-turmystyq ǵımaraty men sheberhanasy, et óńdeıtin negizgi óndiris alańy men qosymsha ınfraqurylymdyq nysandary bar. Zaýyt qurylǵylary Eýropa elderinen, atap aıtqanda, Polsha, Reseı, Italııa memleketterinen ákelinbek.

Qazir zaýyt ǵımaratynyń qurylysy aıaqtalyp, negizgi óndiristik ǵımaratta qurylys-montajdaý júrip jatyr. Et óńdeý kesheni 2021 jyldyń qyrkúıek aıynda iske qosylady.