Arhımed Muhambetov: Jas dárigerlerdi jumysqa shaqyramyz

QOSTANAI. QazAqparat – Qostanaı oblysyna basqa óńirlerden kelgen dárigerler baspanamen qamtylyp, kóterme aqy tólenedi. Bul týraly oblys ákimi Arhımed Muhambetov esep berý jıynynda málim etti, dep habarlaıdy QazAqparat.

2019 jyly oblysqa 265 dáriger kelgen. Onyń ishinde aýyldyq jerge jumysqa jiberilgen 82 mamanǵa 123 mln teńge kóterme aqy tólendi. Sonymen qatar medıtsına qyzmetkerlerin baspanamen qamtamasyz etý máselesi sheshildi.

«Byltyr oblys ákimdigi «Qazaqstan ıpotekalyq kompanııasy» ıpotekalyq uıymymen 350 medıtsına qyzmetkeri úshin turǵyn úı satyp alý týraly kelisim jasady. Nátıjesinde oblys qalalary men aýdandarynyń ákimdikteri basqa jaqtan kelgen 146 mamandy úımen qamtamasyz etti. Osy jyly «Dıplommen aýylǵa» jobasy boıynsha 8,8 mln teńgege 35 medıtsınalyq qyzmetker 100 AEK kóleminde kóterme járdemaqy alady. Sol sebepti jas dárigerlerdi Qostanaı oblysyna jumysqa shaqyramyz», – dedi oblys ákimi.

Jalpy 2020 jyly densaýlyq saqtaý salasyna 3,7 mlrd teńge qosymsha baǵyttaldy. Onyń ishinde emhanalarǵa 80 sanıtarlyq avtokólik satyp alynady.