Arhımed Muhambetov: Volonterler dárigerlerdiń naǵyz kómekshilerine aınaldy
Volonter jylynyń júzege asyrylý barysy týraly oblystyq Jastar saıasaty máseleleri basqarmasynyń basshysy Marat Jurqabaev baıandady. Onyń aıtýynsha, Qazaqstan Prezıdenti Qasym-Jomart Toqaev 2020 jyldy Volonter jyly retinde Qostanaıda ótken Qazaqstan-Reseı Jastar forýmy aıasynda jarııa etti. Sol sebepti bul oqıǵanyń Qostanaı oblysy úshin de mańyzy zor. Oblys ákiminiń tapsyrmasymen óńirlik jospar ázirlendi. Bekitilgen respýblıkalyq is-sharalar josparyna sáıkes barlyq volonterlik jobalar 7 baǵytta biriktiriledi, olar: Sabaqstastyq, Saýlyq, Taza álem, Asyl Mura, Qamqor, Bilim, Úmit. Qostanaı oblysy «Taza álem» baǵyty boıynsha eriktilik qyzmetke erekshe kóńil bóldi.
«Taza álem» baǵytyna saı jumys júrgizýdi uıǵardyq. Bul baǵyt qorshaǵan ortany qorǵaý, ózender men ormandardy tazalaý, aǵashtar otyrǵyzý, qoqysty suryptap úıretýge arnalǵan. Qostanaı oblysynda shamamen 80 volonterlik uıym jumys isteıdi, olar 15 myń adamdy biriktirdi. 2019 jyly respýblıka boıynsha 377 stýdentke kvota bólinip, olar arnaıy jobalardyń qatysýshysy atandy», – dedi Marat Jurqabaev.
Bıyl óńir jastaryna 638 kvota bólingen. «QQazvolunteer.kz» saıtynda 490 stýdent pen 35 jastar uıymy tirkelgen. Olar jyl basynan beri 180 is-shara ótkizdi, sharalarǵa 6 myńnan astam adam qatysty. Aýqymdy jobalardy aıtpaǵannyń ózinde, qart adamdarǵa turmystyq kómek kórsetý, turǵyn úı aýmaǵyn qardan tazartý, muqtaj jandarǵa azyq-túlik jetkizý sııaqty jumystardy mindetterine alǵan.
«Koronavırýs ınfektsııasynyń aldyn alý jaǵdaıynda olar úıde qalýǵa májbúr bolǵan qart adamdarǵa dári-dármek jáne jeke gıgıena quraldaryn jetkizýge kómek kórsetip otyr. Qazirdiń ózinde 270-ten astam volonter nıet bildirdi. Olar 1155 qart adamǵa dári-dármekterdi jetkizip berdi», – dedi basqarma basshysy.
Oblys ákimi Arhımed Muhambetov tótenshe jaǵdaı kezinde jumysqa qatysatyn eriktilerdiń arnaıy jabdyqtarmen qamtamasyz etilýin atap ótti.
«Eriktilerimiz medıtsına qyzmetkerleriniń kómekshilerine aınaldy. Biraq, osy ýaqytta olardyń jeke qaýipsizdigi mańyzdy ekenin eskertemin. Jastardy barlyq qorǵanysh quraldarymen qamtamasyz etip, tolyq jabdyqtaý kerek. Buǵan baıypty qarańyzdar. Eldi mekenderdi kógaldandyrý boıynsha barlyq jumystar osy jyldyń kúzine ýaqytsha aýystyryldy. Tótenshe jaǵdaı kezinde eldi mekenderdi qoqystan tazartý boıynsha barlyq jumystardy kommýnaldyq kásiporyndar esebinen júrgizý kerek. Volonterler bul jumystardan ýaqytsha bosatylsyn», – dedi óńir basshysy.