Arhımed Muhambetov Shoqan Ýálıhanovtyń naqty týǵan jerin anyqtaý boıynsha tapsyrma berdi
Azamattardy qabyldaýdyń ulttyq kúni aıasynda Qostanaı oblysynyń ákimi Arhımed Muhambetov azamattardy jeke máselelerimen qabyldady. Keıbir daýly máseleler sottyń sheshimin kútip otyrsa, keıbiri kezdesý ornynda sheshilip jatty. Olardyń deni – áleýmettik máseleler. Óńir ákimi ótinishterdiń árbireýin jiti qadaǵalap, jaýapty organdardyń oń sheshýine tapsyrmalar júktedi. Solardyń biri belgili etnograf-ǵalym Shoqan Ýálıhanovtyń naqty týǵan jerine qatysty qoıyldy. Áýlıekól aýdandyq ardagerler keńesiniń tóraǵasy Ákimbek Qabdenovtiń sózinshe, búginde Shoqan Ýálıhanovtyń týǵan jerine baılanysty ekiudaı pikir qalyptasqan.
«1985 jyly Shoqannyń 150 jyldyǵy toılandy. Sol jyly Álkeı Marǵulannyń zertteý jınaqtary arqyly naqty týǵan jeri Qusmuryn aýyly ekeni dáleldendi. Bizdiń Qusmuryn aýylynda Shoqannyń kindigin kesken Dármen degen ájeıdiń urpaqtary turady. Olar da Qusmurynda týǵanyn rastaıdy. Biraq, keıingi jyldary bir oblystyń eki aýdany Shoqannyń týǵan jerine talasyp júr. Qazir Kúntımes aýylynda ómirge keldi dep jazylady. Endi osy máseleni memlekettik dárejede kóterýdi usynamyz», - deıdi aqsaqal.
Al oblystyq mádenıet basqarmasynyń basshysy Erlan Qalmaqov aıtqandaı, 1994 jyly ǵalym Manash Qozybaev arhıv qujattary arqyly Kúntımes aýyly ekenin dáleldegen.
«Tarıhshynyń málimetine súıensek, Qusmuryn bolysy bolǵanymen, Qusmuryn beketi keıinnen qurylǵan. Shyńǵys Ýálıhanov Kúntımeste aǵa sultan bolyp turǵan kezde Shoqan dúnıege kelgen. Byltyr «Kıeli Qazaqstan» jobasy boıynsha elordalyq komıssııa ǵalymnyń týǵan jerin Kúntımes dep bekitip berdi», - deıdi Erlan Qalmaqov.
Oblys ákimi elordadan komıssııa shaqyryp, bul máseleni taǵy bir zertteýdi usyndy. Endi Shoqan Ýálıhanovtyń týǵan jerin naqty anyqtaý boıynsha jumystarmen oblystyq mádenıet basqarmasy aınalysady. Ákimbek Qabdenovtiń ótinishi «Kıeli Qazaqstan» jobasynyń arnaıy komıssııasyna, tarıh ınstıtýyna jiberiledi.